Sap ing 18h, drêng kơphô̆ hiăng mơ’no on bâ eăng, Kơphô̆ a kong măng Chợ Nhỏ pơxiâm hlo ro. Lối 60 to ki-ốt mê pơrá hiăng po ‘no on bâ eăng, mơđah tê tê hên tơmeăm mâu kế kâ têa ôu, kế kâ kơhiâm dêi kong pơlê ƀă tơmeăm ki vâ chôu vế. Tơdroăng ki lăm xah hêi rơnó ngui, roê mâu ế tơmeăm apoăng hlo hên hĭn khât ôh ti xê pro pơxúa ro rih ăm kuăn pơlê mê ối veăng gum thăm mơnhông tơdroăng cheăng tê mơdró, ôm hyô a kong măng dêi kong pơlê rế hơniâp ro tâ. O Lê Trúc Thảo Nguyên, hâk ro tối:

“Á troh a Kơphô̆ kong măng Chợ Nhỏ  xua kố cho rôh po kơchô ki apoăng tơkŭm po a bêng Pleiku, tơnêi tơníu tíu ối akố gá kân rơdâ, ngăn gá ro khât, mâu kơbong mơđah tê tơmeăm xuân lĕm ƀă tơbleăng tê hên tơmeăm ki lĕm ƀă kế kâ ki kơhiâm”.

Ôh ti xê to mâu khu hơnăm ối nếo, mê hên rơpŏng hngêi xuân lăm troh akố cho tíu troh ki ro xah hêi apoăng Hơnăm nếo. Nâ Võ Thị Thu Diễm, ối a bêng Diên Hồng ăm ‘nâi:

“Á troh a Kơphô̆ kong măng Chợ Nhỏ mê hlo tơnêi tơnóu akố gá ai hên kơdrâm ro. Mâu kế kâ xuân tơbleăng tê hên há, tro ƀă mâu ngế hơnăm ối kŭn, mâu vâi pú hơnăm ối nếo ƀă rơpŏng hngêi lăm troh akố xah hêi, ôm hyô. Kơphô̆ kong măng châ rơnuâ pro lĕm khât”.

Nếo châ ‘mot tung tơdroăng cheăng la Kơphô̆ kong măng Chợ Nhỏ hiăng chiâng tíu troh ki lĕm tung la ngiâ ‘na mơnhông cheăng kâ kong măng dêi kong pơlê. Malối cho tung mâu hâi apoăng hơnăm nếo, kơxô̆ ngế tơmối troh akố tâk hên hiăng pro ăm tơdroăng cheăng tê mơdró chiâng rế hơniâp ro tâ, djâ vế tơdroăng loi tơngah tung môi hơnăm pêi cheăng kâ pon hơnúa, tơ’lêi hlâu.

A môi to tíu ki tơbleăng tê kế kâ chal krâ, nâ Ksor H’Khal tê mâu kế kâ dêi kuăn ngo Jarai, môi tiah tơxông prông, í poh, chu pheăng, ro pheăng, kơchâi pôm loăng xào trŏng xăng, kơxŭn. Nâ phiu ro tối:

“Ƀă tơmối hên kơdrâm môi tiah kố á phiu ro khât xua châ tơmối ‘nâi troh mâu kế kâ kơhiâm dêi pơlê xiâm Gia Lai xuân môi tiah mâu kế kâ dêi kuăn pơlê hdroâng kuăn ngo Jarai. Ngin hâk tơngăm xua kong pơlê hiăng pro tơ’lêi hlâu mơđah tơbleăng mâu kế kâ kơhiâm dêi pơlê xiâm tơná, to tŏn ah kuăn pơlê kô ‘nâi troh á hên tâ nếo”.

Kơphô̆ kong măng Chợ Nhỏ châ pro achê ttêa plông Hội Phú, môi tíu ki lĕm tung dế kơphô̆ Pleiku, tơdrêng amê hlối cho kơpong kuăn pơlê ối sap ing ton nah, tro ƀă hên tơdroăng ton nah hdrối hâi châ tơleăng lĕm. Pôa Đặng Toàn Thắng, Kăn hnê ngăn Vi ƀan hnê ngăn bêng Pleiku ăm ‘nâi:

“Tơkŭm pro Kơphô̆ prôk chêng a kong măng vâ mơnhông cheăng kâ ôm hyô a kong măng tiô mâu pơkâ pêi dêi pơkâ Hneăng hôp Đảng ƀô̆ kong pơlê Gia Lai ƀă pơka Hneăng hôp Đảng ƀô̆ dêi bêng Pleiku. Ing mê pro chiâng tơnêi tơníu, môi tíu troh vâ tơmối tung lâp tơnêi têa ƀă kong pơlê Gia Lai tối tpdjuôm kô ai tíu ki hơniâp ro a kong măng ƀă bêng Pleiku tối krê ƀă kơpong pơlê kong kơdrâm Pleiku hdrối nah tối tơdjuôm”.

Kơphô̆ kong măng Chợ Nhỏ hên kơdrâm kuăn pơlê troh hêi a kong măng. Kố ôh ti xê to tíu ki vâ roê tơmeăm, xah hêi, mê ối cho tíu troh ki tơdjêp pơlê pơla, mơđah tơbleăng túa lĕm tro kong pơlê ƀă thăm mơnhông cheăng kâ tê mơdró ôm hyô dêi kơphô̆ ngo Pleiku. Tung hyôh kong prâi rơnó hơngui kong ngo, túa rêh kâ ối nếo dế hlo mơnhông, tơhrâ môi hơnăm kô châ hên tơdroăng ki mơnhông.