Pôa Y Kŭt Niê pơxiâm hmâ rơngê ting ting ƀă tôu chêng koăng drêng pôa xiâm 18 hơnăm nah. Pôa ai tối: Roh ton nah, drêng ôh tá hâi ai hlá mơ-éa hriâm trối nôkố, á bu tiô bối mâu vâi krâ pơlê, mâu ngế ki hiăng hên hơnăm, tơmâng vâi hơdruê, ngăn vâi tôu chêng klêi mê, chôa mơhriâm i iâ.

“Á xuân ‘nâi rơngê ting ting ƀă tôu chêng koăng drêng á xiâm 18 hơnăm. Ahdrối mê, á hmâ tơmâng mâu vâi krâ, vâi ki rơkê hmâ tôu chêng koăng, mê á hriâm ƀối. Chôa ‘lâng ing mê, á hiăng chía ‘nâi ƀă hnối pơxiâm hnê ăm kuăn cháu tung pơlê cheăm. Hơnăm 2007 nah, á hiăng pơxiâm hnê mâu vâi o, vâi muăn a Hngêi trung Kuăn ngo ai tíu kâ koi ối pơtê, bu kơ’nâi 3 khế htriâm, mâu vâi o, vâi muăn hiăng chiâng tôu chêng tôu koăng. Kơ’nâi mê nếo, á pơtối lăm veăng tung Khu tôu chêng koăng a Đồng Mô, Sơn Tây, Hà Nội ƀă hnối cheăng amê ta troh a hơnăm 2019”.

Tiô khế hơnăm rế hía rế ton, mâu tơdrá rơngê ting ting Rơđế, idrâp chêng koăng ƀă mâu idrâp ki prông ki prŏng dêi khiê̆n 6 to klŏng hiăng chiâng tơmeăm ki ôh tá păng lôi tung tơdroăng rêh kâ ối dêi pôa Y Kŭt Niê. Ôh ta xê to rơkê tôu chêng koăng, mê pôa ối chiâng vâ mơjiâng mâu prôa tiô khôi hmâ vâi krâ roh nah. Tơdroăng ki kơnâ tâ kơ mê, pôa Y Kŭt Niê ôh tá xê lôi ‘măn to tơdroăng rơkê mê ăm to dêi tơná. ƀă pôa, hnoăng cheăng hnê tối ăm khu rơxông nếo cho hnoăng cheăng ki kân dêi mâu vâi krâ, mâu ki ai hơnăm hiăng hên.

“Vâ khoh chiâng pro môi to khiê̆n 6 to klŏng, athế pro ton chiâ 2 pơla măng tĭng. Tâng pin tơvâ hên mâu tơdroăng cheăng ki ê mê pro athế vâ chê 1 khế nếo kêi. Tiô á, mâu ngế ki prôk ahdrối kal athế pôu râng hnoăng cheăng hnê tối ăm khu rơxông kuăn cháu, vâ ing mê ah, ôh tá hía lôi khôi túa, vêa vong ki lĕm kơnia dêi kuăn ngo tơná. Ƀă mâu vâi pú hơnăm ối nếo athế tí tăng hriăn plĕng xêh vâ châ ‘nâi, châ hlê plĕng, athế tơrŭm ƀă khu rơxông ahdrối vâ mơhriâm, tơpui tơno ‘na tơdroăng ki rơkê plĕng dêi vâi krâ nah, ƀă athế xúa dêi tơdroăng ki ƀĕng ƀĕn chal nếo”.

Pôa Y Kŭt Niê đi đo châ vâi krâ-nhŏng o loi nhoăm xua ing tơdroăng ki djâ troăng ahdrối ƀă hiâm mơno ‘nâi pôu râng dêi tơdroăng cheăng. Pôa xuân ối pơtối rak vế ƀă po lân rơdâ khôi túa lĕm tro tiô khôi hmâ, ing tơdroăng ki mơjiâng pro, hlŭm khiê̆n 6 to klŏng, tôu chêng ta troh a tơdroăng ki veăng pêi pro mâu hnoăng cheăng tơdjuôm dêi pơlê cheăm, veăng hnê tối ăm khu rơxông nếo tung kơpong. Ngoh Y Tiă Niê, ối a buôn Ea Mlay, cheăm MDrak, kong pơlê Dak Lak, cho môi ngế tung khu tôu chêng koăng dêi pôa Y Kŭt nếo hnê mê, ai tối:

“Pôa Y Kŭt Niê cho môi ngế ki djâ troăng ahdrối tung pơlê cheăm. Tung pơla khôi túa, vêa vong dêi hdrông kuăn ngo rế hía rế vâ hía long lôi, pôa xuân ối kơdo mơ-eăm rak vế ƀă tơdjâ khu rơxông nếo, ing tơdroăng hlŭm khiê̆n 6 to klŏng, tôu chêng koăng ta troh a tơdroăng ki kơhnâ veăng pêi pro mâu hnoăng cheăng dêi pơlê cheăm. Ki rơhêng vâ tối, pôa kơhnâ khât tung tơdroăng hnê ăm rơxông nếo, pói rơhêng vâ mâu vâi o, vâi muăn ‘nâi klê, ƀă pơtối rak vế khôi túa, vêa vong dêi hdrông kuăn ngo tơná”.

Ƀă I hiâm mơno ki kâi chân, krá kâk, tuăn rơhêng git ó khât ƀă khôi túa, vêa vong dêi kuăn ngo, pôa hiăng veăng gum kal kân khât tung hnoăng cheăng rak vế, chôu ‘măn, pơtối mơdêk ki kơnía git lĕm tro dêi hdrông Rơđế. Mâu tơdroăng cheăng ki pêi pro mê ôh tá xê to rak vế to idrâp chêng, rơkong rơngê ting ting ăm hâi kố, mê ối mơdâ pêt ăm troh chal kuăn ‘nĕng cháu chái a la ngiâ.