Rôh Têt hơnăm nếo Bính Ngọ 2026 (sap hâi lơ 27 khế môi chât péa troh hâi má 6 Têt), kong pơlê Lâm Đồng tối tơmối troh ôm hyô tâk. Tiô Vi ƀan hnê ngăn kuăn pơlê dêi kong pơlê Lâm Đồng tối, kơxô̆ tơmối troh ôm hyô tâk dâng 925.000 ngế, tâk 32% tâng vâ pơchông ƀă Tết Ất Tỵ hơnăm 2025; tung mê, tơmối tung lâp plâi tơnêi riân châ  62.000 ngế.

Tâi tâng kơxô̆ liăn châ xo xua ôm hyô châ 1.850 rơtal liăn. Tơmối tơkŭm troh hên sap hâi má 2 troh hâi má 4 Têt; hên mâu tíu kot pơtê a Đà Lạt, Phan Thiết ƀă Mũi Né hên hĭn mơngế. Kơxô̆ mơngế xúa veăng koi pơtê riân châ 80-85%, ăm hlo tơ’mot hên tơmối troh, pro xiâm tơ’lêi ăm mơnhông kơvâ ôm hyô tung hơnăm 2026.

-Kơvâ ngăn ‘na Ôm hyô Khánh Hòa pơxiâm mot tung hơnăm nếo ƀă tơdroăng ki tơtêk drêng kơxô̆ tơmối tâk hên, hên tíu hngêi ăm ối hiăng hâ ho, tâi tâng pêi lo liăn tung roh Têt Bính Ngọ hơnăm 2026 châ dâng 2.200 rơtal liăn, tâk lối 62% tâng pơchông ƀă roh kố hơnăm nah. Sap hâi lơ 29 khế má mơ’nui âm lĭt troh hâi má 5 Têt, Tơraih tơƀai lâp plâi tơnêi Cam Ranh pơto vâ chê 800 roh kơneăng ƀă lối 140 rơpâu roh tơmối; rơtế amê cho hên tơmối troh ƀă troăng prôk chêng.

Tơdroăng lăm ôm hyô a rơnó hơngui kơdrâm kơdrĕng, ƀă i hiâm mơno phiu ro a mâu kơpong, tíu ki lĕm, tíu ki krip, mơnâ mâ ngăn. Lâp kong pơlê tơdah dâng 320 rơpâu roh tơmối ối tung hngêi ki tơdah ăm tơmối ối, tâk lối 12%; tung mê, tơmối lâp plâi tơnêi châ dâng 120 rơpâu roh, tâk lối 23%.

Kố cho tơdroăng ki xiâm tơ’lêi hlâu vâ kong pơlê pơtối mơnhông ôm hyô, tơmiât vâ pêi pro troh a hnoăng pơcháu pơkâ pêi lo liăn dâng 77.000 rơtal liăn tung hơnăm 2026.

-Tiô Khu xiâm ngăn Túa lĕm tro, Tơ’noăng Ivá ƀă Ôm hyô kong pơlê Dak Lak, tung  6 hâi Têt (sap hâi lơ 17 troh hâi lơ 22/2), lâp tung kong pơlê tơdah dâng 395.000 tơmối, tâi tâng kơxô̆ liăn châ xo  457 rơtal liăn. Tâng vâ pơchông Tết Ất Tỵ, kơxô̆ tơmối tâk 33% ƀă kơxô̆ liăn châ xo tâk 25%. Mâu kơpong ôm hyô ngăn nhâ loăng kong kế túa lĕm tro tung kuăn pơlê kơpong peăng mâ hâi lu pơtối cho tíu ki tơ’mot hên kuăn pơlê, tung pơla mê peăng mâ hâi lo hên ngế lăm a têa kơxĭ ngăn kong têa.

Hên tơdroăng mơhno túa lĕm tro, tơ’noăng ivá apoăng rơnó hơngui, tơkŭm po tơ’noăng vo plong mâu kơnốu a cheăm Krông Ana, tơ’noăng vo plong a têa kroăng Bùn (cheăm Sơn Hòa) ƀă mâu tơdroăng leh mơdĭng tiô tối hdrối kô po tung la ngiâ. Tơdroăng ăm hlo tơbrê mê tối ki tơ’mot rế hên ngế lăm ôm hyô a kong pơlê bă túa lĕm tro ngăn vâ ‘nâi tơdroăng rêh ối.