Kơxê lơ 26/2, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa tơdah pôa Karl Van Den Bossche, Kăn teăng mâ kong têa Ƀih a Việt Nam tơpui tơno ‘na tơrŭm cheăng Việt Nam - Ƀih, ki má  lối tung kơvâ cheăng kâ – tê mơdró – mơ’no liăn cheăng ƀă tŏng gum tơleăng mâu tơdroăng ki tơdjâk ‘mêi dêi trếo ‘mêi dioxin a Việt Nam.

Mơnhên Việt Nam đi đo ngăn Ƀih cho khu tơrŭm cheăng ki kal tung EU, Ngế pro xiâm hnê ngăn tơnêi têa pơkâ thế péa pâ pơtối rak krá tơniăn tơdroăng loi tơngah kal kí ing tơdroăng thăm tơpui tơno khu râ kăn xiâm, mâu ƀâng; mơdêk châ tơƀrê dêi mâu troăng pơkâ tơrŭm cheăng pơla péa pâ, tơrŭm krá tơniăn a mâu roh hôp tơpui tơno, khu tơrŭm lâp plâi tơnêi.

Tơdrêng amê, péa pâ pơtối rak ƀă mơdêk tơrŭm tung mâu kơvâ cheăng tiô khôi vâi krâ nah môi tiah gâk kring tơnêi têa – gâk kring tơniăn pơlê pơla, khôi túa lĕm tro, hnê hriâm ƀă hnê mơjiâng tuăn ngôa rơkê, hbrâ ví kong prâi hơ’lêh, ôm hyô… ƀă po rơdâ tơrŭm cheăng mâu kơvâ cheăng ton xŏn ‘na khoa hok – kŏng ngê̆, kế ki chiâng hrik mơ’no hyôh, troăng klông…

Klăng roh kố, Ngế pro xiâm hnê ngăn tơnêi têa vêh pơchân tối mơnê Kuô̆k hô̆i râ má péa kong têa Ƀih hiăng tơbleăng ăm pêi pro Tơdroăng pơkâ ‘na tŏng gum mơngế tro trếo ‘mêi dioxin a Việt Nam (khế 10/2023), gum mơdêk dêi mâu kong têa lâp plâi tơnêi ‘na tơdroăng kố.