A môi tíu ki uâ pơliê mơdiê tơmeăm pêi lo ing chiâk deăng a bêng Buôn Ma Thuột, mâu pơ’luăn plâi sầu riêng tum trĭng lĕm châ ‘mot tung kơmăi têng khăng – kơmăi kố gá ối rak ki xú hŏm lĕm, mơngiơk ki kơhiâm ki ai xêh. Sap ing plâi ki ối drêh tiô rơnó, sầu riêng nôkố hiăng chiâng kế kâ ki châ uâ pơliê, châ tâ tung kơhôp pro tơmeăm ki lĕm. Jâ Nguyễn Thị Hường, Kăn pơkuâ Kŏng ti Tơlo liăn Nông Sản N&H a Buôn Ma Thuột ăm ‘nâi:

“Sầu riêng têng khăng châ hâk vâ mâu tơdroăng pơkâ cho ối rak ki xú hŏm, ki kơhiâm, mơngiơk môi tiah ton; tơdroăng pơkâ 5 ôh: ôh ti vât xik, ôh ti vât pơkeăng ‘măn rak, ôh ti vât mâu kế ki pro kơhiâm lĕm ki ê, ôh tá tơ’nôm ki tôu ƀă ôh tá xúa têa rơmâ. Mâu ngế ki roê kâ dêi Dak Lak mê xuân rơhêng vâ djâ vế mâu kế kâ ki kơhiâm lĕm krê dêi Dak Lak ăm mâu ngế ối a tíu ê, kong pơlê ki ê, ki kơhiâm lĕm krê dêi Dak Lak mê cho sầu riêng têng khăng ƀă vâi hiăng pơtroh mâu kơhôp tơmeăm a rôh Têt hơnăm kố”.

Pakĭng mâu plâi kâ ki châ têng khăng, kloăng mắc ca – châ mơnhên cho inâi “ngế ki lĕm má môi dêi mâu túa kloăng” xuân dế veăng ai mâ hên tung mâu kế ki dâ tơmeăm kâ tung rôh têt. Sap ing têng iâ vâ ối rak ki kơhiâm lĕm, troh kơ-óu ƀă hdréa ăm gá ai ngoi xú hŏm krê, mắc ca Dak Lak rế hía rế chiâng tíu ki rah xo hmâ dêi hên rơpŏng tung mâu hâi têt. Jâ Phạm Trần Tú Anh, teăng mâ dêi môi tíu tê mơdró mắc ca kơ-óu ƀă hdréa a cheăm Krông Năng, kong pơlê Dak Lak tối:

“Ngin phiu ro khât drêng hlo mâu tơmeăm dêi tơná kơ-óu hlo vâi vâi roê xúa hên tung mâu hâi têt dêi hên rơpŏng. Mắc ca ôh ti xê cho kế kâ ki kơhiâm mê ối mơhno troăng hơlâ xúa tơmiât troh ivá châ chăn, tơdroăng ki rơkê ƀă nhuô̆m tơmeăm pêi lo ing chiâk deăng dêi pơlê cheăm”.

Rôh têt kố nah, ki kơnía dêi mâu tơmeăm OCOP dêi Dak Lak rế châ hlo nhên. Ôh ti xê to tơmeăm diâp, mâu kế kâ dêi kong pơlê chiâng kông tơdjêp mơhno ‘na ki kơhiâm lĕm dêi pơlê xiâm, pro chiâng túa krê ăm roh tơkŭm kuăn mơngế apoăng hơnăm. A kơƀeăng ‘nân a hâi têt, pakĭng diah mứt kía, mưt plâi toak tiah hmâ, mê ai kloăng mắc ca, sầu riêng têng khăng, kơphế kơ-óu uâ lơ chế thaoh môk pro chiâng kơhiâm lĕm pơla ki ton ƀă ki nếo pơla tiah hmâ ƀă nôkố. Nâ Nguyễn Minh Anh, a bêng Buôn Ma Thuột, kong pơlê Dak Lak tối:

“Rêm rôh Têt troh hơngui vêh, rơpŏng á hmâ tơbleăng tơ’nôm mâu kế kâ ki kơhiâm lĕm dêi Dak Lak tung kế ki ‘măn mâu pơ’leăng pía kái, mứt kía. Tơmối troh hêi tung hêi hâk vâ kâ sầu riêng têng khăng lơ kloăng mắc ca. Gá kơhiâm, rế tơviah há, mơhno tơdroăng ki nhuô̆m hâk kơ tơmeăm pêi lo ing chiâk deăng dêi kong pơlê”.

Tơdroăng ki châ tơbleăng mâu tơmeăm pêi lo ing chiâk deăng OCOP, tơmeăm krê sap ing mâu kơpong pơlê cheăm tung mâu hâi têt, ôh ti xê to tơdroăng ki ôu kâ, mê ối cho môi hvêa chêng prôk ki kal tung mơdêk ki kơnía. Tung mơngiơk hơngui dêi kong ngo, ki xú hŏm lĕm dêi kơphế, mắc ca, sầu riêng têng khăng tơdjuôm ƀă khía pêi, pro chiâng kế kâ ki kơhiâm lĕm krê dêi Dak Lak. Mâu kế kâ OCOP dế pơtroh tơdroăng hâk tơngăm ‘na mơngiơk túa lĕm tro ƀă ivá mơeăm pơhlêh nếo dêi kuăn pơlê a kong pơlê. “Ki xú hŏm lĕm tung rơnó hơngui” sap ing tơmeăm pêi lo ing chiâk deăng Dak Lak dế tơdjâk hơtôu tung mâu rơpŏng hngêi, tơrêm tơdroăng ki tơrŭm tơkŭm apoăng hơnăm nếo.