Rôh tơ’noăng Hếo ngo Tà Cú po rơdâ hơnăm 2026 tơ’mot vâ chê 400 ngế tơ’noăng cho vâi kơnốu, kơdrâi ối tung 37 khu dêi kong pơlê ƀă mâu kong pơlê, pơlê kong kân ki ê, trối: Pơlê kong kân Hồ Chí Minh, kong pơlê Gia Lai, Đồng Nai. Mâu ngế tơ’noăng hiăng tơ’noăng a 2 cư̆ ly: 6.300m (kơtâu 4.000m ƀă hếo ngo 2.300m) ăm khu kơnốu; 5.300m (kơtâu 3.000m ƀă hếo ngo 2.300m) ăm khu kơdrâi.

Pôa Huỳnh Ngọc Tâm, Phŏ Khu ngăn Túa lĕm tro, Tơ’noăng Ivá ƀă Ôm hyô kong pơlê Lâm Đồng ăm ‘nâi: Rôh tơ’noăng hếo ngo Tà Cú kố ôh ti xê veăng gum mơdêk rơdêi tơdroăng tơ’noăng hriâm pât ivá châ chăn ăm kuăn pơlê, mê ối cho rôh vâ mơnhên tối, rah xo mâu ngế tơ’noăng, hbrâ ăm mâu rôh tơ’noăng ki rơkê tung lâp tơnêi têa tung la ngiâ.