Tung rôh lăm pôu kong têa Cuba a kơxo hâi lơ 19/4, (tiô chôu kong têa kố, kơmăng hâi lơ 19/4 tiô chôu Việt Nam) a pơlê kong xiâm La Habana, pôa Vương Đình Huệ, Kăn xiâm hnê ngăn Kuô̆k hô̆i ƀă Khu kăn xiâm Kuô̆k hô̆i Việt Nam lăm pôu, tơpui ƀă mâu kăn ƀô̆ ki cheăng a Tíu pêi cheăng Teăng mâ Việt Nam ƀă Kăn teăng mâ ngăn mơngế Việt Nam a kong têa Cuba.

Tơbleăng a rôh trâm mâ, pôa Vương Đình Huệ tối tơdroăng rơrêk tung hiâm mơno drêng vêh lăm pôu kong têa Cuba ki lĕm; trâm mâ kăn ƀô̆, mâu ngế cheăng a Tíu pêi cheăng Teăng mâ Việt Nam ƀă Kăn teăng mâ ngăn mơngế Việt Nam a kong têa Cuba, môi kong têa hơngế pơlê xiâm ối pá tá plâi tơnêi. Kăn xiâm hnê ngăn Kuô̆k hô̆i ăm ‘nâi, kố cho hneăng lăm pôu dêi râ kăn xiâm má môi dêi Việt Nam troh a Cuba riân sap hơnăm 2022 troh nôkố.

Pakĭng tơdroăng cheăng ki kal dêi khu kăn mê ối ai mâu tơdroăng cheăng dêi mâu ngế tung khu kăn, mâu khu xiâm, kơvâ cheăng, kong pơlê, khu mơdró vâ mơdêk tơrŭm cheăng pơla péa tơnêi têa. Pôa Vương Đình Huệ pơkâ thế kăn teăng mâ, Tíu pêi cheăng teăng mâ, mâu khu mơdró ki dế ‘no liăn pêi cheăng a Cuba mơdêk hnoăng cheăng pêi tơƀrê; mơnhông tơrŭm cheăng krá tâ nếo. Kăn xiâm hnê ngăn Kuô̆k hô̆i púi vâ, mơngế Việt Nam a Cuba pơtối tŏng kum dêi rơpó, môi tuăn dêi rơpó tâ nếo, vâ hnê tối ăm dêi rơpó, kum dêi rơpó. Ing tuăn mơ-eăm, khên tơnôu xuân thế dêi tơnêi têa môi tiah Cuba.