Kơxo lơ 18/4, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa tơdah mâu Kăn teăng mâ mâu kong têa kơpong Arab Thống nhất (UAE), Sri Lanka ƀă Chile tơbleăng kơthô ki kal. Rơkâu mâu Kăn teăng mâ tơdah hnoăng cheăng a Việt Nam, Kăn xiâm hnê ngăn tơnêi têa tối nhên, ƀă túa ki rơkê plĕng pêi cheăng, tuăn pâ ăm tơnêi têa, kuăn mơngế Việt Nam, tơdroăng tŏng kum dêi mâu kơ koan cheăng Việt Nam, mâu kăn teăng mâ kô pêi kêi đeăng lĕm hnoăng cheăng tung hneăng cheăng.

Tơdah Kăn teăng mâ mâu kong têa Arab Thống nhất UAE, pôa Võ Văn Thưởng tối, péa tơnêi têa kal ai troăng pêi rĕng djâ pêi lo liăn pơla péa pâ châ 10 rơtal dollars. Péa pâ xuân kal thăm tơrŭm cheăng kal kí, tơpui kâ ƀă kong têa ê.

Tơdah Kăn teăng mâ Sri Lanka - cho Sajeewa Umanga, pôa Võ Văn Thưởng mơnhên, Việt Nam đi đo nhuô̆m mơnhông mơdêk tơrŭm cheăng tiô khôi vâi krâ nah ƀă tơrŭm hên tơdroăng ƀă Sri Lanka. Péa pâ xuân kal thăm mơdêk tơrŭm cheăng ‘na tê mơdró, mơ’no liăn cheăng, tối ăm dêi pó túa ki rơkê tơtro tung xăm kơklêa kơdroh kơtiê, mơjiâng kuăn mơngế, hnê hriâm, khăm pơlât, tiô khôi túa lĕm tro.

Tơdah Kăn teăng mâ Chile, pôa Võ Văn Thưởng phiu ro hlo tơdroăng tơrŭm cheăng Việt Nam – Chile đi đo châ thăm mơjiâng hên, péa pâ kô chiâng thăm tơrŭm cheăng vâ mơdêk tơrŭm cheăng tung la ngiâ.