Kơxê măng lơ 14/11, pôa Nguyễn Xuân Phúc, Kăn xiâm hnê ngăn tơnêi têa hiăng tơdah pôa Kambiz Ghawami, Kăn xiâm hnê ngăn Khu tơrŭm tŏng kum Đăi hok Lâp plâi tơnêi dêi Alơmăng. Pôa Nguyễn Xuân Phúc, Kăn xiâm hnê ngăn tơnêi têa khĕn kơdeăn hnoăng cheăng dêi pôa Kambiz Ghawami hiăng ai hên hnoăng veăng ‘no ki kal tung mơdêk tơrŭm cheăng pơla Việt Nam ƀă Alơmăng ‘na hnê hriâm ing chât hơnăm hdrối.

Pôa Kambiz Ghawami ƀă Khu tơrŭm tŏng kum Đăi hok Lâp plâi tơnêi dêi Alơmăng hiăng ai hên tơdroăng tơrŭm cheăng nhên ƀă hên to hngêi trung, Tíu hnê hriâm a Việt Nam, môi tiah Hngêi trung Đại học Việt - Đức. Nhoăm hlối mơnê kơ pôa Nguyễn Xuân Phúc, Kăn xiâm hnê ngăn tơnêi têa hiăng mơdoh chôu tơdah, pôa Kambiz Ghawami ăm ‘nâi, đi đo púi vâ mơdêk tơrŭm cheăng pơla péa tơnêi têa tung kơvâ hnê hriâm ƀă hnê mơjiâng tuăn ngôa rơkê.

Tung hneăng lăm pôu mê, pôa hiăng pêi cheăng ƀă mâu hngêi trung ki má môi a Việt Nam. Ing Khu tơrŭm tŏng kum Đăi hok Lâp plâi tơnêi dêi Alơmăng, kong pơlê kân Hessen hiăng diâp môi hnoăng liăn hriâm  ăm sinh viên Việt Nam.