Mâu cheăm Khổng lào, Hoang Thèn, Mường So ai 30 kơpong pơlê, tâi tâng ai 3 rơpâu 404 rơpŏng, ai 5 hdroâng kuăn ngo: Xuăn, Thái, Dao, Mông, Dáy rơtế rêh ối. Kuăn pơlê a mâu cheăm mê đi đo tơrŭm dêi pó, nhŏng o, mơjo pâ dêi pó; rak vế, pêi pro lĕm tro mâu troăng pơkâ, tơdroăng tơdjâ dêi Đảng, túa pơkâ, luât xiâm dêi tơnêi têa, rak vế mâu tơdroăng pơkâ, mơ’no thế a kơpong kuăn pơlê rêh ối, kơhnâ khât tung tơ’noăng pêi chiâk pêi deăng, kơdroh kơklêa xăm kơtiê, troh nôkố hiăng ai 2 tung 3 cheăm châ dó inâi thôn pơlê nêó.

Vâi krâ-nhŏng o ‘nâi rak vế, pêi pro dêi mâu khôi túa, vêa vong lĕm tro dêi hdroâng kuăn ngo tơná, kơhnâ khât tung rak vế mâu túa cheăng, hnối rak vế tơniăn tơdroăng rêh ối ƀă pêi pro hên tơdroăng lĕm ki ê. Tơpui tơno ƀă kuăn pơlê, pôa Nguyễn Xuân Phúc, Kăn xiâm hnê ngăn tơnêi têa tối nhên, tơrŭm cho môi tung mâu hnoăng cheăng ki kơnía git khât dêi hdroâng kuăn mơngế Việt Nam; vâ môi tuăn dêi pó, mâu kuăn pơlê kal athế hlo nhên dêi hnoăng cheăng tơná ƀă thôn pơlê, tơnêi têa; tí tăng pêi pro khât hnoăng cheăng vâ tŏng kum dêi pó vâ rêm ngế, rêm hngêi rơpŏng rế hía ai tơdroăng rêh ối lĕm ro tâ.

Vâi krâ-nhŏng o tơrŭm achê dêi pó, mơjiâng on veăng, rơpŏng hngêi, pơlê pơla, tí xê to vâ mơnhông pêi cheăng kâ, pêi lo kế tơmeăm, pro kro mơdrŏng mê ối rak vế ki kơniá git khôi túa, vêa vong dêi hdroâng kuăn ngo, hiâm mơno, tuăn lĕm tro dêi rơpŏng hngêi, hdroâng hdrê; mơhnhôk kuăn ‘nĕng loi nguăn, kơhnâ khât, hriâm tâp rơkê păng ‘nâng ƀă hên mâu tơdroăng ki ê.