Veăng mơđah tơbleăng ai: Pôa Tô Lâm Kăn xiâm pơkuâ hnê ngăn Đảng; pôa Phạm Minh Chính Ngế pro xiâm hnê ngăn Chin phuh; pôa Trần Thanh Mẫn Kăn xiâm hnê ngăn Kuô̆k hô̆i; mâu kăn hnê ngăn, mâu kăn Đảng hneăng hdrối, Tơnêi têa ƀă lối 3.000 ngế kăn dêi 34 to kong pơlê, pơlê kong kân, mâu khu mơdró kân tung lâp tơnêi têa ƀă mâu tơmối lâp plâi tơnêi.

Tơbleăng a rôh pơxiâm po Mơđah tơbleăng, pôa Phạm Minh Chính Ngế pro xiâm hnê ngăn Tơnêi têa loi tiah kố, ing hnoăng pơkuâ dêi Đảng Cộng sản Việt Nam quang vinh, pơtối rak vế tơdroăng pêi pro 80 hơnăm mơjiâng, kring vế ƀă mơnhông tơnêi têa, mâu kăn cheăng kal kí, rêm tâ, kơvâ cheăng, kong pơlê ƀă tâi tâng kuăn pơlê pin kô pơtối tơrŭm, tơdjuôm ivá, mơ-eăm  ƀlêi chiâng 2 tơdroăng pơkâ pêi 100 hơnăm ki Đảng hiăng pơkâ.

A rôh leh, pôa Tô Lâm  Kăn xiâm pơkuâ hnê ngăn đảng, pôa Phạm Minh Chính  Ngế pro xiâm hnê ngăn  tơnêi têa ƀă mâu kăn Đảng, tơnêi têa hiăng pêi tiê nit pơxiâm po mơđah tơbleăng “80 hơnăm  pêi pro Tơniăn krê - Hlâu hlĕng- Hơniâp ro” koh tơbâ 80 hơnăm hâi mơjiâng tơnêi têa Cộng hòa Xã hội Chủ nghĩa Việt Nam.  Mơđah tơbleăng lôu péa sap 9 chôu troh 22 chôu, tung mâu hâi sap lơ 29/8 troh tâi hâi lơ 5/9.