A cheăm Khánh Sơn, kong ngo peăng mâ hâi lâ Khánh Hòa, kơtăn ing tíu xiâm kong pơlê lối 120km, tơnêi tơníu kân, ngo ngối tâ tá, thôn pơlê ối tơprâ tơprŭng hngế ing dêi rơpó. Hdrối nah, tơdroăng séa ngăn cheăng tơdroăng cheăng pêi a tíu pêi cheăng trâm hên xơpá. Nôkố, rêm kơxo má dêi kăn ƀô̆ pơxiâm ƀă tơdroăng ki po tiâ kơmăi tĭnh, đăng nhập phần mềm Kơlo kơxô̆ vê ngăn tơdroăng pêi cheăng tơƀrê dêi tơdroăng cheăng-KPI. A um tơvi lo inâi hnoăng cheăng: Tơdah kuăn pơlê, chêh pro mâu hlá mơ-éa, tiâ mơnhên tơdroăng kal ki kơdrâ ‘nâi.

Mơ’nui hâi, ôh ti kal kơbố tối, rêm ngế tiê tíu ki hdró hiăng pêi klêi tơdroăng cheăng, chêh mâu tơdroăng ki trâm tơ’nôm. Phân mêm hiăng chiâng “ngế ki séa ngăn ôh tá hlo ƀă mâ”, gum kăn pơkuâ ‘nâi nhên tơdroăng cheăng maluâ tơnêi tơníu kân rơdâ, tơdrêng amê hlối pro ăm kăn ƀô̆ hmâ ƀă tơdroăng ki hbrâ rơnáu, séa ngăn xêh tơná. Nâ Nguyễn Thị Hà, chuyên viên Khu mơjiâng Đảng cheăm Khánh Sơn, tối, kố cho tơdroăng hmâ nếo châ mơjiâng sap ing khế 4/2025, drêng kong pơlê xúa KPI ăm rêm tíu pêi cheăng, ƀă túa pêi nếo gum nâ tơ’lêi hlâu tâ:

“Xúa KPI ngin hlo tơ’mô ôh tá pơrah ngế ki lâi. Tơná á tơdroăng cheăng gá kô ôh tá tro hrá. Ngin ‘nâi dêi tơná pêi châ to lâi tơdroăng cheăng, to lâi tơdroăng chêh pro mơ-éa, quăn trĭ ƀă hên ki ê tơdrêng amê hlối pơchông kơlo ki pá hên lơ iâ pơchông ƀă kong chưk rơtế pêi bô bối tơdroăng cheăng. Mơnhên tối nhên tâ ki tơƀrê dêi tơná ing tơdroăng châm điêm dêi kăn pơkuâ”.

Khu dêi KPI dêi kong pơlê Khánh Hòa châ pro pơkí ƀă tơ’mô, xúa sap ing chuyên viên troh kăn pơkuâ. Ôh ti xê to râ cheăm, hên kơ koan tí tăng ‘nâi plĕng ƀă tíu pêi cheăng dêi kong pơlê hiăng xúa KPI. Pôa Nguyễn Minh Tuấn, phŏ kăn pơkuâ Tíu xiâm Mơnhông Khu rak ngăn tơnêi kong pơlê tối rơdêi, KPI hiăng gum tíu pêi cheăng riân ngăn ki rơkê tung pêi cheăng, pro tíu ki rak tơniăn tro liăn ngân ăm tíu pêi cheăng rak ngăn xêh liăn ngân:

“Tâng ôh tá kâi mơdât mê kăn ƀô̆ ai hlá mơ-éa tơbleăng tơdroăng cheăng hên la ki tơƀrê dêi hâi pêi cheăng iâ. Hâi pêi cheăng ƀă liăn khế pá pơkuâ ngăn, tơdroăng cheăng mơdon, tơdroăng ki kâ liăn khế ăm mâu ngế pêi cheăng gá rế xơpá ăm tíu pêi cheăng”.

Vâ mơnhông tơƀrê túa ki mơnhên tối kăn ƀô̆ rơkê tơdroăng cheăng ƀă KPI, kong pơlê Khánh Hòa hiăng mơjiâng Tôh pêi cheăng KPI, tơkŭm kăn ƀô̆ ki rơkê tơdroăng cheăng, pêi cheăng rêm măng tĭng. Kăn pơkuâ hnê ngăn cheăng Đảng Khánh Hòa, pôa Nghiêm Xuân Thành pơkuâ tơdrêng mâu rôh hôp mơnhên tối, mâu tơdroăng pêi pro tá hâi tro. Ki khât lối khế xúa ăm hlo KPI gum rah xoăng tơdroăng cheăng nhên, hlối tiô kơlo hâi chôu ƀă hê̆ kơxô̆ ôh tá tơniăn.

Pêi cheăng rĕng, troh hâi tơ’nôm điêm; hrá hâi tah điêm. Jâ Võ Thị Thu Hương, phŏ ngế pơkuâ Kơpong cheăng kâ ƀă Kơpong cheăng ƀă kơmăi kơmok, ngế cheăng tung Tôh pêi cheăng KPI, ăm ‘nâi:

“Tung pơla pêi pro tơdroăng cheăng kô tro ƀă kơlo dêi rêm tơdroăng cheăng, hlối tá hâi chôu pêi klêi. Pêi klêi rĕng tâ hâi pơkâ mê châ tơ’nôm, tơ-rôu hrá pêi klêi mê tro tah điêm. Kơlo kơxô̆ ôh tá tơniăn dêi tơdroăng cheăng châ riân tiô kơlo sap ing 1 tơngi klêng. Ing mê, điêm KPI dêi rêm ngế kăn ƀô̆ kô châ chêh tơkŭm tiô khế, tiô hneăng, tiô hơnăm, ngăn tiô kơlo xúa dêi kăn pơkuâ”.

Sap ing tơdroăng ki tôu tuăn apoăng “chêh ‘mot mâu kơxô̆ liê̆u xơpá”, hên kăn ƀô̆ a Khánh Hòa rế hía rế ngăn KPI môi tiah “pơkeăng lĕm rêm hâi”, gum pơkuâ ngăn tơná tơniăn tro tâ. Pôa Phạm Quốc Hoàn, Kăn pơkuâ Khu ngăn Khoa hok ƀă kong ngê̆ tối tiah kố, ai KPI, kăn pơkuâ tơ’lêi mơhno tơdroăng ki rơdêi-ki ‘ro dêi rêm ngế krê tung pêi cheăng.

“Khu cheăng kơmăi e- Office nôkố hiăng tơkŭm pơkuâ KPI kố, tơdroăng cheăng chêh nhât kĭ ki chiâng chêh xêh, chiâng ai nhât kĭ ăm rêm ngế kăn ƀô̆ chêh tiô ƀối tơdroăng cheăng. Tơdroăng kố hlối ai tá tơdroăng ki pơrá châ chêh tung phân mêm. Ôh ti ai ki klâi xơpá drêng tơbleăng pêi”.

Tơdroăng ki tơdrăng tung mơnhên tối ƀă KPI gum kăn ƀô̆, viên chưk pôu râng dêi hnoăng tâ, pơkuâ tơ’lêi hlâu tâ drêng mơ’no pơkâ tung tơdroăng cheăng pơkuâ ngăn. Hdrối nah, tơdroăng ki hmâ xúa “pêi klêi rơkê tơdroăng cheăng” hmâ cho rơkong hmâ tơpui. Nôkố, rêm ngế pơrá ai ƀảng điêm krê, kơxô̆ chôu pêi cheăng ƀă kơxô̆ hô sơ pro klêi tro hâi khế gá chiâng tơniăn tâ châ pêi pro pơhlêh.

Ing Khánh Hòa, hiâm mơno pơhlêh nếo hiăng trâm tro túa pơkâ dêi Tơnêi têa. Tơdế khế 7, Khu ngăn ‘na pơkâ troăng hơlâ-Tơdroăng cheăng tung la ngiâ Tơnêi têa pơkâ xúa KPI, pro chiâng ai tơdroăng po rơdâ túa pơkuâ ngăn ki tơƀrê tung tâi tâng kơ koan cheăng kal kí, xúa sap ing hâi lơ 1/1/2026. Pôa Trần Lưu Quang, Kăn pơkuâ hnê ngăn Đảng Tơnêi têa, ngế xiâm ngăn Khu troăng hơlâ-Tơdroăng cheăng tung la ngiâ Tơnêi têa, Kăn pơkuâ ngăn Đảng pơlê kong kân Hồ Chí Minh drêng pêi cheăng ƀă kong pơlê Khánh Hòa tối:

“Kố cho túa pêi cheăng ôh ti xê kong pơlê ki lâi xuân pêi. Pó hiăng tơmiât rơkê drêng tơmiât lo ƀô̆ tiêu chĭ ki nhên. Hdrối nah, pin hmâ mơnhên tối túa ki riân, ƀă mâu rơkong ki hmâ xúa bô bối môi tiah “thăm mơnhông”, “mơdêk rơdêi. Rôh kố, kong pơlê hiăng khŏm mơ-eăm pơhlêh nếo, séa ngăn nhên tung mơnhên tối kăn ƀô̆. Tâi tâng mâu kăn pơkuâ kong pơlê hiăng môi tuăn khât, bu rơhêng vâ hiâm mơno môi tuăn kố châ tơdjâk troh cheăm, châ pêi tiah mê, mê pin hiăng ƀlêi chiâng”.