Hneăng tâ phĭu rah xo kăn Kuô̆k hô̆i hneăng 16 ƀă kăn Hô̆i đong kuăn pơlê rêm râ tung kong pơlê Quảng Ngãi, hneăng 2026-2031 châ po a hâi lơ 15/3/2026 (hâi tĭng). Kố cho tơdroăng kal kí khât po klêi hneăng hôp mâu kăn Đảng ƀô̆ kong pơlê Quảng Ngãi rôh má 1, Hneăng hôp mâu kăn tung lâp tơnêi têa rôh má 14 dêi Đảng.

Jâ Bùi Thị Quỳnh Vân, Kăn pơkuâ hnê ngăn Đảng kong pơlê Quảng Ngãi pơkâ thế Ƀơrô Tỉnh ủy tơrŭm ƀă mâu kơ koan ki tơdjâk troh thâ pê klêi pơkâ tơdroăng cheăng tâ phĭu. Kăn pơkuâ hnê ngăn Tỉnh ủy Quảng Ngãi vâ môi tuăn mơjiâng Tôh kum tơdroăng cheăng pêi dêi Khu kăn hnê mơhno tâ phĭu dêi kong pơlê, pơkâ thế pê klêi tơdroăng mơjiâng khu kăn tâ phĭu a râ kong pơlê ƀă râ cheăm hdrối hâi lơ 30/11/2025.