Pơtối rôh hôp ‘na tơdroăng luât khế 4, hâi kố lơ 14/4, Vi ƀan pơkuâ Kuô̆k hô̆i ăm rơkong tơpui tối ‘na troăng hơlâ ‘no liăn cheăng tơdroăng tơkêa troăng tơdjêp kơpong, tơdjêp mâu kong pơlê Khánh Hòa, Ninh Thuận ƀă Lâm Đồng. Tơdroăng tơkêa kố ai tâi tâng ƀăng tơnêi dâng 129 ha, tung mê, tơnêi kong kal hơ’lêh tơdroăng ki xúa cho 75 ha; tâi tâng ki xŏn 57 km. Tíu kố ki tơkoh dêi rơpó cho ƀă troăng kân 27C kong pơlê Lâm Đồng, tíu ki mơ’nui a tíu tơkoh kong pơlê Khánh Hòa ƀă kong pơlê Ninh Thuận.

Tâi tâi kơlo liăn ‘no bro dâng 1 rơpâu 929 rơtal. Tiô tối hdrối kô klêi tâi tâng mâu troăng kố a hơnăm 2027. Pôa Vương Đình Huệ, kăn xiâm hnê ngăn Kuô̆k hô̆i tối nhên: Tơdroăng tơkêa kố ai pơxúa khât, kum mơnhông troăng prôk dêi kơpong ngo peăng mâ hâi lu kong pơlê Khánh Hòa tung mê ai 2 tơring Khánh Sơn ƀă Khánh Vĩnh.

Tơdrêng amê hlối pro tơ’lêi troăng prôk tơdjêp kơpong ƀă mâu tơring peăng kong ngo dêi mâu kong pơlê Ninh Thuận, Lâm Đồng, mơdêk cheăng kâ rêh ối pơlê pơla, mơdêk tơdroăng gâk kring.