Sap hâi lơ 1/7 troh hâi lơ 15/8, mâu kơ koan kĭ hô̆ tĭch dêi kong pơlê Lâm Đồng hiăng pro ăm lối 46.400 hô sơ, tung mê vâ chê 36.200 hô sơ tơdrêng tung troăng măng ƀă vâ chê 7.300 hô sơ tơdjêp điê̆n tưh.

Vâ rơnêu pá puât, tơleăng tơvâ tơvân tung pêi pro khu râ kăn pơkuâ 2 râ ƀă kơvâ hô̆ tĭch, Phŏ Ngế xiâm Khu xiâm mơjiâng luât Nguyễn Thanh Ngọc, tối ƀă kơxô̆ tơdroăng cheăng 80% pro mơ-éa nôkố tơleăng a râ cheăm, kong pơlê Lâm Đồng kal kơjo tơmâng tŏng gum rah xo mâu kăn ƀô̆ pêi cheăng hnê ‘na luât cheăm; tơmâng mơ’no liăn mơjiâng pro hngêi trăng, troăng klông kŏng ngê̆ thông tin; rôe tŭm tơmeăm khoăng kơmăi kơmok tơxâng pơkâ pêi pro hnoăng cheăng rêm hâi.