Kơxo lơ 15/11, Kŏng an kong pơlê Dak Lak ‘no lêng tăng rup mâu ngế ki ai xôi tung lâp kong pơlê. Mâu tơdroăng cheăng ki tơmâng pêi châ Kŏng an kong pơlê Dak Lak tơbleăng pêi rôh kố cho: kơdroh mâu ki ai xôi, xôi ‘na ma tŭi, cheăng kâ, ăm mung liăn tơvêh tơkâ hên, rak tơniăn ‘na troăng prôk, tơniăn ‘na hbrâ mơdât on chếo, tơpâ on chếo.

Mâu khế mơ’nui hơnăm 2022, malối cho rôh hdrối, tung ƀă klêi Têt Lo hơnăm nếo Qúy Mão 2023, cho leh tơbleăng kơphế Ƀuôn Ma Thuột rôh má 8,  Kŏng an kong pơlê Dak Lak pơtối mơdêk mâu troăng rơhlâ tơplâ hbrâ mơdât mâu ki ai xôi, tơkŭm tơplâ ƀă mâu tơdroăng kâ kơluâ, tơmeăm ôh tá xê khât, tơmeăm bu bối tơbleăng tê, rak tơniăn ‘na tơmeăm tê a rôh Têt.