A thôn Dak Snao, cheăm Quảng Sơn, kơpong ki tơhnah tơhnâp rơdâ lối 4ha, tơdjâk 79 rơpŏng ƀă 454 pơ'leăng mâ mơngế. Tâi tâng 79 rơpŏng hiăng châ khu kăn pơkuâ kong pơlê djâ lăm ối a tíu tơniăn. Vi ƀan kong pơlê Lâm Đồng tơbleăng tơdroăng ki thâ 'na kong prâi pro ôh tá tơniăn a kơpong kố.

A cheăm D'Ran, têa kroăng Cát rơlêa pro tơhnah tơhnâp ó kĭng, kông ƀê tong a pơlê Ga, thôn Phú Thuận, pro 8 rơpŏng ƀă 35 pơ'leăng mâ mơngế tro tơklâ. Khu kăn pơkuâ kong pơlê hiăng mơhnhôk mâu khu, rơxế 'mâi rơnêu tơhnâp, po troăng prôk, djâ kuăn pơlê lo ing kơpong rơ-iô ƀă tơkŭm gak ngăn, pơtâng tối.

Tung pơla mê, pơtối tung péa hâi lơ 19 ƀă 20/9, tơnêi hmốu ing kĭng ngo Prenn, bêng Xuân Hương - Đà Lạt tơhnah tơhnâp troh a troăng prôk. Khu ki ai tơdjâk rĕng ai mâ xing xoăng troăng prôk, mơhnhôk rơxế tơkŭm tah tơnêi hmốu, rak tơniăn ăm kuăn pơlê ƀă rơxế prôk lăm. Hdrối tơdroăng ki ôh tá tơniăn dêi kong prâi, Vi ƀan kong pơlê Lâm Đồng pơkâ thế mâu tơring tơkŭm kring vế, xing xoăng mơngế gak ngăn, xĕn kuăn pơlê ƀă rak tơniăn kế tơmeăm khoăng.