Leh hlá tơbeăng Rơnó Hơngui Ất Tỵ kong pơlê Kon Tum hơnăm 2025 tơbleăng lối 100 kơxop hlá tơbeăng Hơngui dêi mâu kơ koan chêh hlá tơbeăng tung kong pơlê ƀă kong pơlê ki ê. Rêm kơxop ai chêh ƀă in mơgiơk lĕm eăng vâ mơhno ki pơhlêh nếo, mơnhông tơná dêi tơnêi têa ƀă tơngah ‘na tơdroăng pơhlêh kơxô̆ dêi hlá tơbeăng.

Tơdrêng ƀă ki hên tơdroăng chêh tung êm kơxop hlá tơbeăng, tíu mơđah ƀă pơchuât mê châ rơnuâ nuâ lĕm tơtro ƀă Rơnó Hơngui, vâ mâu ngế tung kong pơlê Kon Tum a rôh Têt kố troh pơchuât. Ngế chêh hlá tơbeăng xuân chêh văn pôa Lê Văn Thiềng, cheăng tung kâu lăk ƀô̆ Khu chêh hlá tơbeăng hơnăm ối nếo, Khu chêh hlá tơbeăng Kong pơlê Kon Tum ăm ‘nâi: “Mâu tơdroăng chêh xuân tro tiô troăng hơlâ, tro troăng hnê tối ki nếo, tơdroăng hnê mơhno dêi mâu kăn Đảng, Tơnêi têa malối cho pôa Tô Lâm, Kăn xiâm pơkuâ hnê Đảng. Tơdroăng tơbleăng mê lĕm mơnâ mâ, tro túa vêa vong ƀă rơxông pơ’lêh kơxô̆”.  

A leh pơxiâm po Khu Hlá tơbeăng rơnó Hơngui Ất Tỵ hơnăm 2025, Khu chêh hlá tơbeăng Kon Tum diâp ăm Khu xiâm pơkuâ Mố đô̆i gak tơkăng kong mâu hlá tơbeăng Rơnó Hơngui vâ pơtroh ăm mâu kăn ƀô̆ mâu lêng tíu tơkăng kong.