Pơkuâ roh trâm mâ, Kăn pơkuâ Nguyễn Hữu Thoan tối ăm ‘nâi: Tung pơla kố nah, kăn ƀô̆, mâu lêng tíu cheăng Kơpong 5 Khu lêng gâk kring têa kơxĭ đi đo châ tơdah tơdroăng tơmâng tŏng kum, kum prôk rơtế dêi hên kong pơlê, tíu cheăng tung lâp tơnêi têa.

Kố cho tơdroăng ki mơhnhôk hiâm mơno kân vâ kăn ƀô̆, mâu lêng hmiân tuăn pêi cheăng, pêi kêi đeăng hnoăng cheăng châ pơcháu. Teăng mâ khu râ kăn teăng mâ 10 kong pơlê, pơlê kong kơdrâm peăng Hdroh, Kăn phŏ hnê ngăn Vi ƀan kong pơlê Vĩnh Long – pôa Đặng Văn Chính kheăn kơdeăn tơdroăng châ tơƀrê pêi pro hnoăng cheăng kal kí dêi Kơpong 5 Khu lêng gâk kring têa kơxĭ tơdrêng amê mơnhên mâu kong pơlê kô pơtối mơdêk mâu tơdroăng pêi tơmiât troh têa kơxĭ, rơlố pơlê xiâm ƀă mâu troăng pêi ki kơnâ, pơxúa vâ mơhnhôk kăn bô̆, mâu lêng pêi pro lĕm tro hnoăng châ pơcháu, kum gâk kring hnoăng pơkuâ têa kơxĭ, rơlố krih tơviah dêi Tơnêi têa.