Klêi kơ’nâi kong mê têa kân lân lu ki ó a kĭng têa kroăng Dà Nhim, ngoh Nguyễn Quốc Bảo, a cheăm Đơn Dương, Lâm Đồng, xuân tá hâi kâi piu tơdroăng ki rơ-iêo. Tíu ki pro hngêi nhĕng 4.000m2 kơnâ lối 1,6 rơtal liăn dêi rơpŏng ngoh hiăng tro têa kân mơhiu. Ngoh khéa:

“Ivá mơeăm ‘măn kơdĭng to lâi liăn ngân á hiăng hrê tâi tung kố mê nôkố á ôh ti ai ki klâi xếo vâ pêi. Nôkố tâng á vêh pro mê athế ok tơnêi, mê gá kơnâ liăn khât”.

Mâu rơpŏng ki pêt kơchâi tiô túa pơkâ pêt tiah hmâ a kĭng têa kroăng Dà Nhim xuân dế mơeăm xông klêi kơ’nâi kong mê têa lân lu. Râng ‘nêk po plâ hâi mê bu nếo chiâ hlo châ to chât mêt klŏng têa tôh, ngoh Hồ Việt Linh, thôn Tân Lập 1, cheăm Ka Đô, ăm ‘nâi, lối 6.000m2 hơlât  dêi rơpŏng dế hbrâ vâ poê tê mê tro têa lân lu mơhiu tâi. Tơnêi prêi nôkố gá kơđu trâu ai tíu ki ‘nâ kơđu troh 1 mét. ‘Mâi mơnhông châ tơdroăng ki pêt gá rế ‘no hên ivá rế hrê hên liăn ngân roê tơmeăm khoăng vâ pêi:

“Ai tíu ki ‘nâi hía, ai tíu ki ‘nâ tro tơnêi tâp kơđu tâi. Nôkố athế pêi choâ ‘lâng xo. Ai ki klâi ki u ối mê á ối xúa, ki klâi ai xếo, tơ’nhiê mê athế pơhlêh. Nôkố athế roê ƀek, roê kơxái roê hên ki ê hía. Tơnêi mê tá hâi chiâng pêi tơkôm kong tôu lĕm ‘nôi nếo chiâng pêi”.

Tro lŭp tâi tâng cho péa tơdroăng ki tro má môi ăm kơpong ki pêt hên kơchâi, plâi, pôm a kĭng têa kroăng Dà Nhim ki xŏn luâ mâu cheăm: D'Ran, Ka Đô, Đơn Dương, Quảng Lập dêi kong pơlê Lâm Đồng. Rơtế ƀă ƀăng tơnêi pêt kơchâi dế vâ poê xo, tro lŭp hên tâ ƀă mâu ngế ki pêt kơchâi xúa kong ngê̆ chal nếo a kơpong kố xua hngêi hlâm, hngêi nhĕng ƀă liăn ‘no hrê pro 1.000m2 tâk troh lối hrĭng rơtuh liăn.

Hlo tơdroăng ki tro lŭp kố dêi kuăn pơlê ki pêt kơchâi, kơvâ pêi chiâk deăng ƀă kăn pơkuâ mâu cheăm kơpong ki hên kơchâi dêi kong pơlê Lâm Đồng hiăng tơbleăng pêi cheăng hnê mơhnhôk pêi chiâk, ăm mung liăn pêi chiâk vâ gum kuăn pơlê ‘mâi mơnhông dêi tơdroăng pêt mâu hdrê tơmeăm. Pôa Trần Hùng Dũng, Kăn hnê ngăn Vi ƀan cheăm Đơn Dương, kong pơlê Lâm Đồng, ăm ‘nâi:

“Ki ahdrối, cheăm pơtối mơhnhôk vâi krâ kuăn pơlê hbrâ rơnáu ‘mâi rơnêu dêi ƀăng tơnêi pêt tơmeăm ki tro têa lân lu tung pơla hdrối kố nah ƀă kô tơmiât ngăn mâu hdrê pêt ki lâi pêt ăm tơtro. Malối cho vâ tê tung rôh Têt Lo hơnăm nếo kố ah athế rah xo mâu hdrê pêt, mâu kơchâi ki pêt iâ hâi vâ teăm tê tung pơla rôh Têt Lo hơnăm nếo. ‘Na ki ton kô pơtối po pông tơnêi ƀă ai troăng tơmiât pêi pêt ton tâ mê athế ai túa pơkâ pêi nhên vâ mơhnhôk tơlo mâu kơxô̆ liăn ing ê vâ ‘mâi mơnhông pêt kơchâi dêi cheăm Đơn Dương.