“Khŏm mơ-eăm, kơtăng pêi pro lĕm tro pơkâ pêi mơ’no liăn tơnêi têa hơnăm kố vâ veăng gum châ pơkâ tơtêk 8%’’. Kố cho pơkâ dêi pôa Mai Văn Chính, Phŏ Ngế pro xiâm hnê ngăn Chin phuh a roh hôp mơ’no tơdrêng tung um dêi Tôh pêi cheăng kơxô̆ 7 ‘na séa ngăn mơhnhôk, tah lôi pá puât, tơvâ tơvân mơdêk mơ’no liăn tơnêi têa 2025 dêi 5 kong pơlê kơpong Tây Nguyên.

A roh hôp mâu kong pơlê hiăng tối tơbleăng ƀă mơnhên nhên mâu tơdroăng pá puât, tơvâ tơvân, xiâm kối ƀă pơkâ troăng tơleăng ƀă mâu tơdroăng tơkêa bro mơ’no liăn tơnêi têa.

Xông tơpui a roh hôp, pôa Mai Văn Chính, Phŏ Ngế pro xiâm hnê ngăn tơnêi têa tối nhên, hơnăm kố cho hơnăm vâ tơtêk, pêi pro pơkâ pêi 5 hơnăm 2021 – 2025, ƀă khŏm mơ-eăm tơtêk sap ing 8% tơngi klêng. Tối nhên Chin phuh, Ngế pro xiâm hnê ngăn Chin phuh tơmâng khât pơkuâ, hnê mơhno, kơtăng trâu hơngế ‘na mơ’no liăn tơnêi têa, Phŏ Ngế pro xiâm hnê ngăn Chin phuh tối ăm ‘nâi, pơla kố nah Chin phuh hiăng mơjiâng 7 tôh pêi cheăng ‘nâi tơdroăng po rơdâ pêi pro, ‘na xing xoăng kơxô̆ liăn, mơ’no liăn ngân tơnêi têa.

Tiô Phŏ Ngế pro xiâm hnê ngăn tơnêi têa hnoăng cheăng sap ing kố troh mơ’nui hơnăm cho hngăm, xua mê pơkâ thế, vâ tơkŭm po pêi pro ai châ tơƀrê mơ’no liăn ngân tơnêi têa tung la ngiâ, 5 kong pơlê kơpong Tây Nguyên kal pơtối mơdêk tơdroăng mơhnhôk tá khu cheăng kal kí veăng tung roh tơkŭm po pêi pro kơtăng ƀă châ tơƀrê. Ing mê, veăng kum tung tơdroăng mơnhông cheăng kâ dêi tơnêi têa, châ pơkâ tơtêk 8% a hơnăm kố.