Sap mâu tíu tế mơdró ki hmâ ing nah troh kơchơ mơdró tung điê̆n tưh ƀă măng pơlê pơla, hên tơmeăm pro ki hêak pơloi vâ chêh Yến Sào Khánh Hòa châ tơbleăng tê ôh tá kơtôa. Ôh ti xê to xúa inâi krếo vâ môi tiah, mâu ngế ki ‘mêi ối chêh bô bối môi tiah inâi tĕm tĕm yến sào ki pêi lĕm krúa. Ôh tá xê to xúa inâi krếo vâ môi tiah, mâu khu ‘mêi ối chêh ƀối bơbối mâu tơdrong tâ, tĕm tem ƀă logo vâ kơtôa ki hêak pơloi kơ mâu ngế rôe. Tiô Kong ti Yến Sào Khánh Hòa, nôkố ai 122 khu mơdró xúa hmâng vâ inâi "Yến sào Khánh Hòa"; 42  khu mơdró chêh inâi tê mơdró ƀă 55 đơn chêh tĕm tem ki vâ bơbối inâi hiăng châ kring vế. Tung măng xuân hlo dâng 280 tài khoản Facebook ƀă website ki tăng hêak pơloi.

Tiô mâu ngế rơkê, drêng tơmeăm ôh tá xê khât tơbleăng tê lâp lu, ki lŭp ôh ti xê to ‘na khu mơdró mê ối tơdjâk tơdrêng troh mâu ngế păn chêm yến sào ƀă mâu tíu păn krúa lĕm. Mơngế rôe xua ôh tí châ tối nhên kô pro iâ mơngế rôe, tơdjâk troh ki kơnâ dêi tơmeăm pêi lo ƀă vâ po rơdâ kơchơ mơdró. Pôa Trần Kiêu Hưng, Ngế pơkuâ rak ngăn kơchơ mơdró kong pơlê Khánh Hòa ăm ‘nâi, hên tơmeăm pro xôi luât vâi pro pro bơbối môi tiah hlối tơdrong tơmeăm ki khât, inâi tĕm tem ƀă thăm nếo chêh inâi mơjiâng pro ôh tá tro ki khât vâ mơngế ki rôe loi tơmeăm lĕm khât.

“Pro xôi hên má môi cho vâi chêh “Yến sào Khánh hòa”, kô cho nâl ki kŏng ti hiăng châ kring vế tung lâp tơnêi têa. Pơla hdrối kô nah, ngin hlo hên tơmeăm ki pro xôi luât, mơjiâng pro a tíu ê la xuân chêh Yến Sào Khánh Hòa. Ai mâu tơmeăm chêh inâi tíu mơjiâng pro a Khánh Hòa la drêng mơnhên ngăn tíu ki mê ôh tá ai. Mơngế ki rôe xúa drêng vâi pơchuât ngăn ƀă vâi hlo Yến sào Khánh Hòa vâi tơmiât mê cho yến sào cho tíu ki mơjiâng pro a Khánh Hòa ƀă dêi Kong ti Yến sào Khánh Hòa”.

Tơdrốu khế apoăng hơnăm 2026, Kŏng ti Yến sào Khánh Hòa mơjiâng pro lối 130 rơtuh tơmeăm, tê châ vâ chê 1.700 rơtal liăn, kum vâ chê 3.900 ngế ai cheăng. Mâu kơxô̆ ki mê ăm hlo yến sào veăng kum hên cheăng kâ a kong pơlê. Vâ kring vế hnoăng ki pơxúa dêi mơngế ki pêi lo. Khu xiâm rak ngăn kơchơ mơdró kong pơlê Khánh Hòa ƀă Kŏng ti Yến sào Khánh Hòa hiăng kĭ tơhrâ tơdroăng tơrŭm séa ngăn, tăng ngăn kơchơ mơdró, pơxâu mâu ki pro xôi luât xua túa ngôa rơkê.