Klêi mâu hâi kâ Têt sôk ro, phiu niu, pôa Nguyễn Viết Đồng, ối a bêng Ea Kao, kong pơlê Dak Lak hiăng lo pêi kơphế tăng ngăn dêi ki hngiâm kơchoh tơnêi, ngăn kơmăi tôh têa ki ăm têa lo xêh, hbrâ têa tŭm têa toh ăm loăng plâi. Pôa Đồng ăm ‘nâi, kơdrum loăng dêi rơpŏng hngêi dế tung pơla ai plâi, bê têa vâ tôh kô gum ăm kơdrum loăng drêh dêi plâi rĕng kân, mơdêk ki kơ’muăn plâi châ hên tung hơnăm kố ah.

“Vâ tơdah môi rơnó châ xo hên, mâu hvêa prôk apoăng ki kal, vâ toh troh hâi khế vâ ăm loăng lo eăng kơ’muăn plâi lĕm. Ngin mơdoh kâ Têt, hbrâ vâ lăm a kơdrum tung mâu hâi rơnó hơngui vâ tôh ăm loăng kơphế. Púi vâ ti lâi rơnó hơngui Bính Ngọ sôk ro, rơnó pêi kơphế hơnăm kố kô châ hên”.

Kơ’nâi mâu hâi Têt rơrŭm dêi rơpó, pôa Nguyễn Văn Trường (cheăm Čư̆ Pơng, kong pơlê Dak Lak) xuân tơvâ tơvân hên tơdroăng cheăng vêh pêi dêi kơdrum kơphế rơdâ 1,5 ha dêi rơpŏng hngêi vâ hbrâ ăm rôh toh ki má péa, rôh ki xiâm kum ăm loăng ai plâi kơbâng ƀă xông tơniăn. Vâ tơniăn têa tôh, pôa Trường hiăng ‘no liăn pêi tơdrêng mâu tơdroăng cheăng chiâ long têa lêk baih a ’nâi tung long mơdât têa hngiâm ‘no têa tung mê vâ toh kơdĭng.

“Nôkố, tung cheăm vâ tối hngêi ki lâi xuân ăm rơxế kui tơnêi, rôe ƀaih lêh tung klôh ‘no têa kơdĭng. Pro long ƀă ƀaih ai pơxúa. Kuăn pơlê hlo tíu lâi ai têa vâi hrik têa mơ’no a mê hlối vâ kơdĭng tung long. Drêng troh mơ’nui rơnó mơdrăng mê xúa têa ki ‘măn kơdĭng vâ tôh mâu loăng plâi”.

Dak Lak nôkố ai dâng 213.000 ha kơphế, tơkŭm hên a kơpong peăng mâ hâi lu (kong pơlê Dak Lak ton). Kơnôm hbrâ têa tôh, xúa khoa hok kih thuât ƀă pơtối rak ngăn loăng plâi, mê plâi kơphế a hơnăm 2025-2026 pơtối rak a kơlo hên, châ lối 570 rơpâu tâ̆n, pro pơxúa hên ăm mơngế ki pêt.

Tung pơla mê kuăn pơlê pêi chiâk ki ối a peăng mâ hâi lu lăm pêi ngăn dêi loăng plâi ton hơnăm ki ai pơxúa hên mê kuăn pơlê a peăng mâ hâi Lo kong pơlê Dak Lak lăm pêi cheăng a têa kơxĭ klêi kơ’nâi mâu hâi ro rơnó Hơngui tơdah Têt. A kơno tuk ká Đông Tác, bêng Phú Yên, kong pơlê Dak Lak, hên mâu tuk tơnăng ká ngừ a têa kơxĭ lăm troh a kơno tuk. Ngoh Hồ Ngọc Hội, môi ngế vo plong tối:

“Hâi 5 Têt nhŏng o ngin mâu ki vo plong troh a kơno tuk. Ro ‘nâng, tơnăng ká châ hên ká ngừ. Têt hrá hơnăm 2026 kố vâ tối ngăn châ liăn ing têa kơxĭ”.

Xuân troh a kơno tuk ká Đông Tác klêi mâu hâi ro rơnó hơngui tơdah Têt, ngoh Hồ Trọng Hạnh, ngế pơkuâ tuk ká a bêng Phú Yên, kong pơlê Dak Lak, hâk ro tối:

“Rôh lăm a têa kơxĭ tơnăng ká drêng kố châ hên, mâu nhŏng o ngế ki lâi xuân phiu ro. Apoăng hơnăm lo lăm tơnăng ká châ tiah mê cho hâk ‘nâng yôh”.

Tung pơla mê kuăn pơlê tơnăng ká dế thâ lăm troh a kơno tuk, mâu ngế ki lăm rôe, khu mơdró tơxup dêi rơpó lăm rôe drêng tuk nếo troh a kơno. Pôa Cao Thành Hưng, Kăn teăng mâ môi khu mơdró ki hmâ lăm rôe ká ngừ tê ăm kong têa ê ăm ‘nâi, ká tơnăng a têa kơxĭ Trường Sa rôh kố lĕm kân, châ kơchơ ki pơrah môi tiah châu Âu, Mih, Nhuk vâ rôe . Tâi tâng mâu ká ki  tơnăng châ djâ troh a kơno tuk tung hâi apoăng hơnó Hơngui xuân châ khu mơdró rôe tâi.

“Apoăng hơnăm ngin mơ-eăm rôe ƀă yă kơnâ, kơjo kum kuăn pơlê klêi mâu hâi ton pá puât tơnăng a têa kơxĭ, vâ ngế ki lâi xuân ai hâi klâ Têt hrá phâi tơtô”.

Tiô riân dêi Khu xiâm ngăn Ká xi xŏng ƀă Têa kơxĭ chuăn kong pơlê Dak Lak, klêi Têt Bính Ngọ, rêm hâi ai chât toăng tuk ká (ki hên cho tơnăng tăng ká ngừ a têa kơxĭ) vêh troh a kơno tuk, djâ hên ká châ hrĭng tâ̆n.

Sap mâu kơdrum kơphế ngiât lĕm troh mâu toăng tuk pêng to ká troh a kơno apoăng rơnó hơngui, um kơchuâ pêi cheăng klêi têt a Dak Lak dế po hên  tơdroăng lĕm ro. Mơngế rĕng lo pêi cheăng, tuăn tơmiât vâ rơtế ƀă kuăn pơlê ƀă khu mơdró hiăng pro xiâm krá kâk ăm môi hơnăm nếo ƀă hên tơdroăng tơngah. Ƀă tuăn loi nếo, mơ-eăm pêi cheăng ƀă túa pêi pro rế ai pơxúa tơƀrê, kuăn pơlê pêi chiâk, kuăn pơlê ki tơnăng ká dêi Dak Lak tơngah môi hơnăm Bính Ngọ châ blêi trâng, tơdroăng rêh ối rế xông tơƀrê, veăng ‘no hnoăng mơnhông cheăng kâ rêh ối dêi kong pơlê.