Kuăn pơlê hdroâng kuăn ngo Khánh Hòa mơ-eăm mơnhông
Thứ năm, 05:00, 05/06/2025 Tơplôu: Katarina Nga/VOV Miền Trung Tơplôu: Katarina Nga/VOV Miền Trung
VOV.Xơ Đăng – Kong pơlê Khánh Hòa hiăng tŏng gum tơƀrê tơdroăng pêi pro Pơkâ dêi Khu xiâm pơkuâ tơdroăng kal kí ‘na mơjiâng, mơnhông kong pơlê Khánh Hòa troh hơnăm 2030, troăng ngăn troh hơnăm 2045 rơtế ƀă Tơdroăng pơkâ tơnêi têa mơnhông cheăng kâ rêh ối pơlê pơla kơpong kuăn ngo ƀă peăng kong ngo. Lối 4 hơnăm tơbleăng, sap ing liăn dêi mâu troăng hơlâ tŏng gum kố hiăng gum kuăn pơlê kuăn ngo peăng kong ngo khên tơnôu, mơnhông cheăng kâ krá tơniăn.

Nâ Pi Năng Thị R En, tơring Khánh Vĩnh cho tơdroăng ki mơhno nhên tung tơdroăng hluăn ing kơtiê a kơpong kuăn pơlê hdroâng kuăn ngo a kong pơlê Khánh Hòa. Rơpŏng nâ rêh ối tung toăng hngêi ki pơtân, rêm rôh kong mêi kân mê athế lăm hmuâ ối a tíu ê. Kơnôm ai troăng hơlâ tŏng gum pro hngêi ối krá kâk, nâ R En nôkố hiăng ai tíu ối tơniăn.

“Châ Tơnêi têa gum pro ăm hngêi lĕm krá, hngêi ối ôh tá xi kơchoh xếo ƀă ôh tá tro kong mêi kơchoh xếo. Rơpŏng ôh ti kal lăm ối dêi a hngêi nôu pâ xếo. Rơpŏng á xuân mung tơ’nôm liăn vâ pro hngêi mơdrah. Châ pơxúa ing tơdroăng Tơnêi têa diâp ăm túa rêh kâ ối, ngin mơ-eăm păn mơnăn, mơ-eăm pêi chiâk deăng, xo ah hmôi ai tơdroăng rêh ối tơniăn tâ. Á păn sap ing 2 to ro nônố hiăng châ 10 to”.

Kong pơlê Khánh Hòa ai lối 82.000 ngế kuăn pơlê hdroâng kuăn ngo, ki hên cho hdroâng Raglai, tơkŭm ối a 2 tơring Khánh Sơn ƀă Khánh Vĩnh. 4 hơnăm hdrối, Hô̆i đong hnê ngăn kong pơlê Khánh Hòa pơkâ 15 tơdroăng; Vi ƀan hnê ngăn kong pơlê pơkâ 33 tơdroăng, 10 túa pơkâ pêi ƀă hên hlá mơ-éa hnê mơhno, pơkuâ tơbleăng pêi pro tơdroăng ăm kuăn pơlê peăng kong ngo. Tung mê, kong pơlê hiăng pơkâ mâu tơdroăng ki xiâm ăm phêp mâu tơring cheăm xúa liăn ngân ƀă kơxô̆ liăn tŏng gum ki ê vâ gum tơdrêng ăm 2 tơring Khánh Sơn, Khánh Vĩnh.

Tung pơla tơbleăng pêi tơdroăng, kong pơlê hmâ tơkŭm lăm ngăn, a mâu tơring cheăm vâ teăm tŏng gum xơpá, mơdêk rĕng tơdroăng pêi pro. Pơla hơnăm 2021 – 2025, tâi tâng kơxô̆ liăn ‘no pêi ăm tơdroăng kố châ lối 790 rơtal, tung mê 85% sap ing liăn tơnêi têa. Nôkố pêi châ liăn rêm ngế tâk péa xôh tâng vâ pơchông ƀă hơnăm 2020, châ lối 30 rơtuh liăn môi ngế tung môi hơnăm; kơxô̆ rơpŏng kơtiê kơdroh 7,2% tung hơnăm. Kong pơlê hiăng têa tah lối 1.130 toăng hngêi ối pơtân, tơ’nhiê xi kơchoh; pro, ‘mêng lối hrĭng tơmeăm kuăn pơlê xúa.

Troh nôkố, tâi tâng mâu cheăm hiăng ai troăng rơxế ô tô kơto lăm troh tíu xiâm, tâi tâng rơpŏng kuăn pơlê pơrá châ xúa on tơhrik ƀă têa ôu kâ hum roh krúa lĕm. Pôa Võ Nam Thắng, Kăn pơkuâ Khu ngăn Hdroâng kuăn ngo ƀă Loi tĭng tiô khôp kong pơlê Khánh Hòa ăm ‘nâi, troăng hơlâ tŏng gum pro hngêi ối ƀă tŏng gum túa rêh kâ ối gum kuăn pơlê tơniăn tung rêh ối, hluăn ing kơtiê krá ton.

“Ngin tơkŭm po ăm mâu khu ki châ kuăn pơlê loi nhuô̆m veăng pôu ngăn mâu hngêi kơmăi tung kong pơlê ƀă kong pơlê ki ê vâ mơdêk ki hlê plĕng tung hnê tối. Tơdrêng amê hlối tơrŭm ƀă hngêi trung Chính trị kong pơlê hnê nâl kuăn ngo ăm kăn ƀô̆ ki xiâm a 2 tơring Khánh Sơn, Khánh Vĩnh ƀă mâu tơring, tíu pêi cheăng. Ngin xuân mơnhông hnê hriâm ăm kăn ƀô̆ pơkuâ vâ gum vâi hlê nhên ƀă kơhnâ tơbleăng tơdroăng pơkâ tơnêi têa a tơring cheăm”.

Pơla hdrối kố nah, 2 tơring peăng kong ngo Khánh Sơn ƀă Kháng Vĩnh hiăng châ Ngế pro xiâm hnê ngăn tơnêi têa mơnhên hluăn ing kơtiê. Pơkâ dêi Khu xiâm pơkuâ tơdroăng kal kí mot tung tơdroăng reh ối hiăng gum mơdêk ki hlê plĕng, pro tơdroăng ki pơhlêh trâu hơngế ‘na túa tơmiât mơnhông dêi kuăn pơlê peăng kong ngo. Ing tíu ki tơkôm, hên rơpŏng kuăn pơlê mơ-eăm, khên tơnôu pơhlêh pêt mâu hdrê loăng, mơnhông cheăng kâ.

Hên túa pơkâ mơjiâng pêi chiâk hưh cơ, tơmeăm OCOP, kơpong pêt VietGAP, túa pro kơdroăng păn, tíu pêt, khu pêi cheăng tơrŭm tiô túa nếo ƀă hên ki ê dế rế hía rế châ pro ƀă po rơdâ.

Pôa Bùi Hoài Nam, kăn pơkuâ ngăn Đảng tơring Khánh Sơn ăm ‘nâi: troh nôkố, mâu cheăm kơpong hdroâng kuăn ngo ƀă peăng kong ngo tung kong pơlê hiăng châ pro mâu kơpong ki hmâ pêt, hmâ păn môi tiah: Kơpong pêt sầu riêng a Khánh Sơn 2.900 ha.

“Tơring Khánh Sơn hluăn ing kơtiê la mâu túa pơkâ tŏng gum pêt mơjiâng, mơnhông cheăng kâ đi đo châ tơtrŏng tiô troăng tŏng gum túa rêh kâ ối krá ton. Tơring Khánh Sơn dế pơhlêh sap ing hdrê pêt ki ôh tá dâi lĕm chiâng pêt mâu hdrê loăng ki lĕm plâi kơtóu hên. Ngin dế tơmiât troh mâu rơpŏng hdroâng kuăn ngo ai kơxô̆ rơpŏng mơdrŏng, chía niân tâk hên”.

‘Măn chôu hên kơxô̆ liăn ‘no pêi cheăng mơnhông cheăng kâ rêh ối pơlê pơla kơpong kuăn pơlê hdroâng kuăn ngo ƀă peăng kong ngo pơla hơnăm 2021 – 2025, kong pơlê Khánh Hòa hiăng mơjiâng kơpong kong ngo mơnhông tơniăn, krá ton, ai hên túa lĕm tro. Mâu troăng hơlâ tŏng gum, tơdroăng kố ôh ti xê to gum péa tơring peăng kong ngo hluăn ing kơtiê mê ối pro ivá mơnhông ton xŏn, mơjiâng mâu kơpong ivá nếo, gum pêi pro pơhlêh tơdroăng mơnhông tŭm têk kong pơlê Khánh Hòa troh hơnăm 2030, troăng ngăn troh hơnăm 2025.

Pôa Nghiêm Xuân Thành, kăn pơkuâ hnê ngăn Đảng kong pơlê Khánh Hòa pơkâ thế tung hneăng la ngiâ, mâu tơring kal tơkŭm pêi pro tro tơdroăng hriăn ngăn khoa hok, kong ngê̆ vâ pro tơdroăng mơnhông tơƀrê nếo:

“Kal athế pêi pro pơhlêh tung pêi chiâk deăng, xúa kong ngê̆ thong tin, pơhlêh kơxô̆. Tơdroăng kố khu kăn pơkuâ athế veăng gum. Kố cho tơdroăng pêi pro rơkê, ăm vâi krâ kuăn pơlê peăng kong ngo ivá, pôi tá rêm ngế kuăn pơlê môi tơdroăng xơpá mâu tơdroăng kố. Ki xiâm cho thăm mơnhông ki kơnía tung môi ƀăng tơnêi. Túa pơkâ kal athế pêi pro tro, klâ xoăng ôh tá mơhúa. Pakĭng sầu riêng kal pêt tơ’nôm mâu hdrê loăng plâi ki ê, vâ rak tơniăn ăm vâi krâ kuăn pơlê tơniăn tung rêh ối”.

 

 

Tơplôu: Katarina Nga/VOV Miền Trung

Viết bình luận

TIN CÙNG CHUYÊN MỤC

Video

Bi mni kơ Awa Hô
Đơs git oh, git bi
06/05/2025
Jreng Jrong
30/03/2024
Tanh bĕ dra hiam
22/03/2024