Tiô Khu tơkŭm po, mâu tơdroăng ki kal châ khu chêh hlá tơbeăng tối tung pơla hdrối nah cho tơkŭm tung mâu tơdroăng ki tơbleăng pêi túa pơkâ kăn pơkuâ 2 râ, ôh tá tơniăn a mâu troăng prôk, cheăng pơkuâ ngăn hmốu prêi xơmong, meăm vâ mơjiâng pro tơmeăm, pơreăng châi klêa chu châu Phi ƀă tro pôu ‘mêi xua kâ kơƀăn mi a cheăm M’Drak.

‘Na mâu tơdroăng ki kal kố, kăn pơkuâ mâu Khu râ, pơkuâ cheăng ki ai tơdjâk hiăng tối nhên ƀă mơ’no tối mâu troăng hơlâ ‘mâi rơnêu tơtro. Tơdjâk troh ƀai “Xơpá dế trâm klêi 15 hâi pêi cheăng tiô túa kăn pơkuâ 2 râ a Dak Lak”, mơ’no tung VOV, kăn pơkuâ mâu cheăm bêng ki ai tơdjâk troh tơmâng xo VOV hiăng tối tro tơdroăng.

Pôa Nguyễn Tự Do, phŏ kăn hnê ngăn Vi ƀan cheăm Quảng Phú ăm ‘nâi, mâu tơdroăng ki xơpá ki lâi ki hlá tơbeăng tối, hiăng châ ‘mâi rơnêu, tơdroăng pêi cheăng dêi cheăm nôkố hiăng hlo tơniăn. A rôh hôp tơbleăng, kăn pơkuâ kong pơlê Dak Lak xuân tối ‘na mâu troăng hơlâ mơnhông ki rơdêi ‘na cheăng kâ a têa kơxĭ, tơdroăng cheăng kâ a tung kong ƀă túa pơkâ tơbleăng pêi hên hĭn mâu kế tơmeăm ki kal.