Hên hâi hdrối nah, a tíu ki kơdê xâ chêh mâm chu tơkŭm Nhơn Bình, ối tung Kŏng ti pêi cheăng tiô rơnó Mơjiâng pro, uâ pơliê mơdiê hơ’nêh mâm Quy Nhơn, bêng Quy Nhơn Đông, cheăng lăm ngăn í peâp ki vâi roê xo, châ séa ngăn kơtăng. Hdrối vâ châ pơtroh troh tíu ki xâ chêh, chu châ tơkŭm pa gong. Akố, ngế ki pơkuâ tíu xâ chêh athế tơbleăng tối tŭm mâu tơdroăng ‘na xiâm rêi, tíu păn ƀă kơxô̆ chu ai to to. Khu ki ai tơdjâk séa ngăn kô séa ngăn nhên. Pôa Nguyễn Quang Thái, phŏ kăn pơkuâ Kŏng ti ăm ‘nâi, pakĭng séa ngăn dêi mâu kăn ƀô̆, ngế ki mơdró kâ xuân athế ai túa pơkâ krê vâ séa ngăn ki lĕm rơkê tung xâ chêh:

“Tâng châ ‘nâi chu ai tâ pơreăng mê kŏng ti kô tối ăm kơ koan ki ai tơdjâk, kơvâ pơlât mơnăn vâ pơkâ tơleăng tiô pơkâ”.

Tiô jâ Nguyễn Thị Ngân Hà, Tíu ki séa ngăn ƀă Pơlât mơnăn, Khu xiâm Păn mơnăn kong pơlê Gia Lai, tơdroăng pơreăng châi klêa chu châu Phi dế tâ tú rơ-iêo. Bu tung pơla môi khế hdrối, Gia Lai hiăng ‘nâi ai 5 tíu ki ai pơreăng, tâi tâng hiăng ai lối hrĭng to chu tro pơreăng hiăng châ prâu tah. Xua mê, túa pơkâ séa ngăn ‘na xâ chêh, cho vâ rak tơniăn ‘na hơ’nêh chu, rế châ pêi pro kơtăng tâ nếo.

“Ngin pơkuâ roê xo chu sap ing 9 chôu kơxo má, séa ngăn tŭm mâu tơdroăng troh a 21 chôu, ƀă ngin kô vêh séa ngăn tâi tâng vâ rak vế tơniăn chu ôh ti tro pơreăng troh 1 chôu 30 phut kơxo hâi kơ’nâi xâ chêh kô rak tơniăn ki lĕm ƀă ki rơdêi troh tíu xâ chêh ƀă tê ăm kơchô mơdró”.

Tung lâp kong pơlê Gia Lai nôkố ai 11 to tíu xâ chêh mâm chu tơkŭm ƀă vâ chê 800 tíu xâ chêh ki kŭn, xâ chêh iâ. Kơvâ cheăng ki ai tơdjâk troh kong pơlê Gia Lai hiăng ƀă dế hnê mơhno mâu cheăm thăm mơnhông séa ngăn a tâi tâng mâu tíu ki xâ chêh, xuân môi tiah mâu tíu tê í peâp tung lâp kong pơlê. Tơbleăng cheăng hnê tối trâu hngế mâu troăng hơlâ hbrâ mơdât pơreăng troh kuăn pơlê, malối cho mâu rơpŏng păn chu. Ki xiâm cho vâ mơdêk ki hlê plĕng ăm kuăn pơlê ‘na ki rơ-iêo dêi pơreăng, malối cho mâu tơdroăng ki pơto chơ, tê mơdró chu ƀă hơ’nêh mâm chu ki roê xo ôh tá tro luât, ki ai mâu pơreăng tâ tú hên.

Pôa Huỳnh Ngọc Diệp, Ngế xiâm pơkuâ tíu păn mơnăn kong pơlê Gia Lai, ăm ‘nâi tơ’nôm:

“Tung tơdroăng ki ai pơreăng tâ tú môi tiah dế nôkố, ngin hiăng hnê mơhno Tíu păn mơnăn dêi mâu kơpong tơrŭm ƀă kăn pơkuâ mâu cheăm vâ thăm mơdêk séa ngăn tơdroăng cheăng xâ chêh ki kŭn ki iâ a cheăm tá hâi mơjiâng pro tíu xâ chêh tơkŭm. Tung pơla roê xo chu châ hlo ai mâu chu ki tro pơreăng ngin kô klâ ăm ối krê. Klêi mê ngăn tơrêm to chu séa ngăn mâu túa pơreăng, malối cho pơreăng châi klêa chu châu Phi mê ngin kô pơkâ pêi tiô pơkâ môi tiah prâu tah, tâp kơđu, xúa nhiê̆t ƀă mâu tơdroăng ki pơtối tiô pơkâ”.

Pakĭng séa ngăn tơdroăng ki xâ chêh, thăm mơnhông séa ngăn pơreăng, vâ mơdât pơreăng châi klêa a chu tâ tú rĕng, sap ing khế 7, kong pơlê Gia Lai hiăng pro 4 to tíu gâk séa ngăn pơreăng a chu ki ai tơdjâk pơtân a mâu kơpong ki xiâm, veăng gum séa ngăn kơtăng tơdroăng ki hbrâ mơdât pơreăng.