Sap ing hâi lơ 15/11 hơnăm nah, Khu pơkuâ kuăn pơlê pêi chiâk deăng kong pơlê hiăng mơhnhôk pêi pro roh tơ’noăng ki má môi ƀă mâu râ khu ƀă tâi tâng khu kuăn pơlê pêi chiâk deăng tung kong pơlê. Tung 1 hơnăm hiăng hluâ, kuăn pơlê pêi chiâk deăng lâp kong pơlê hiăng pêi pro châ vâ chê 1.100 tơmeăm, mâu tơdroăng cheăng.

Roh kố, Khu pơkuâ kuăn pơlê pêi chiâk deăng kong pơlê Dak Lak kheăn kơdeăn 21 khu pú hên ƀă ngế krê rơkê má môi tung pêi pro tơdroăng tơ’noăng koh phiu ro Leh tơbâ 120 hơnăm Hâi mơjiâng kong pơlê Dak Lak. Diâp Mơ-éa mơnhên “Tơmeăm pêi chiâk deăng ki má môi kong pơlê Dak Lak hơnăm 2024” ăm 25 tơmeăm dêi 23 khu tơrŭm cheăng, ngế krê tung kong pơlê. Mơđah, tơbleăng lối 200 mâ tơmeăm ki má môi, tơmeăm kum tung pêi chiâk deăng xúa kŏng ngê̆ rơxông nếo ƀă pêi chiâk deăng hưh cơ dêi mâu râ Khu pơkuâ kuăn pơlê pêi chiâk deăng 15 kong pơlê, pơlê kong kơdrâm.