Klăng tơbâ 42 hơnăm hâi Hnoăng cheăng mâu thái cô Việt Nam, kơxo kố Kuô̆k hô̆i tơpui a hngêi hôp kân ‘na kơxop hlá mơ-éa Luât Thái cô. Hdrối mê, tung rôh má 1 Kuô̆k hô̆i hiăng tơpui a tôh, ai mâu kăn pơkâ thế kơxop hlá mơ-éa kân mơhno mâu troăng hơlâ tŏng gum thái cô tơxâng ƀă mâu hnoăng cheăng ki vâi pleăng; tơdrêng amê hlối ai troăng hơlâ mơhnhôk mâu thái cô pêi cheăng a kơpong hdroâng kuăn ngo ƀă peăng kong ngo, kơpong ai tơdroăng rêh ối pá puât ƀă hên ki ê.

Mâu kăn vâ ‘nâi plĕng khât troh tơdroăng ki mơnhên mâu pơkâ ƀă thái cô ôh ti xê kong lâ̆p; thái cô châ pơkâ ăm pêi tro ƀă ivá cheăng la xuân ối rak tơniăn tơdroăng krê tro ƀă rêm râ hriâm ƀă tơdroăng ki hriâm tâp. Mâu kăn tơpui Luât thái cô veăng gum mơjiâng troăng hơlâ tŏng gum ăm hnoăng cheăng hnê mơngế.

Kơxê, Kuô̆k hô̆i tơmâng pơchuât Hlá mơ-éa pơtroh, tơbleăng séa ngăn tơdroăng tơkêa Luât ‘mâi pơhlêh, ‘mot tơ’nôm mâu tơdroăng dêi Luât séa ngăn dêi Kuô̆k hô̆i ƀă Hô̆i đong hnê ngăn kuăn pơlê ƀă Tơpui tơno a hngêi hôp kân ‘na Troăng ‘no liăn pro troăng rơxế lơ treng ing Kơnhŏng troh peăng Hdroh; Rơnêu troăng ‘no liăn cheăng pro Tơraih tơƀai lâp plâi tơnêi Long Thành.