Pơtối tơdroăng rôh hôp má 4, hâi 10/11 Kuô̆k hô̆i têk kŏng tối vâ tơbleăng pơkâ ‘na tơdroăng Pơkâ mơnhông mơdêk cheăng kâ- rêh ối hơnăm 2023. Pơkâ mơnhông mơdêk cheăng kâ-rêh ối hơnăm 2023 xua pôa Phạm Minh Chính, Ngế pro xiâm hnê ngăn tơnêi têa tối tơbleăng a rôh pơ xiâm po hneăng hôp Kuô̆k hô̆i tối nhên tơdroăng vâ pêi pơtối rak tơniăn cheăng kâ kân, séa ngăn mơdât liăn oh tă ai yă, mơnhông mơdêk cheăng kâ, tơniăn ƀă tơdâng kân dêi cheăng kâ.

Séa ngăn, mơdât mâu pơreăng tâ tú. Tung 12 khu tơdroăng cheăng, troăng rơhlâ pêi dêi Chin phuh tối, tơkŭm hên rak tơniăn cheăng kâ kân, séa ngăn mơdât liăn ôh tá kơnâ yă; pê klêi luât pơkâ; mơdêk tơƀrê tơkŭm cheăng tro tiô luât; mơdêk rĕng tơdroăng hbrâ mơdât kâ kơluâ xơpá, ôh tă tro; mơdêk hôu khĕn pơxâu phâk mơngế ki pro xôi luât; mơdêk pêi cheăng tơƀrê rak ngăn tơnêi têa.

Tơmâng khât mơnhông tâi tâng ƀă tơdâng tơ‘mô tung kơvâ mơhno túa lĕm tro, tơniăn tơrŭm pơla mơnhông cheăng kâ ƀă mơhno túa lĕm tro rêh ối pơlê pơla tơniăn rêh ối, mơnhông  rêh ối tơmeăm khoăng, tuăn hiâm kuăn pơlê.