Tiô tối hdrối, kong mêi pơtối ôh tá tơniăn, malối a 32 to cheăm, bêng ki tơ'lêi tro têa lân lu, têa rơlêa, tơnêi hmốu tơhnah kró. Hlo ai tơdroăng kố, khu kăn pơkuâ cheăm bêng tung kong pơlê dế hbrâ tơbleăng mâu troăng hơlâ hbrâ ví, rak tơniăn ăm kuăn pơlê. Tiô hnê mơhno dêi Vi ƀan kong pơlê Lâm Đồng, khu cheăng a 124 to cheăm, bêng, kơpong pơtối séa ngăn nhên tơdroăng kong prâi ôh tá tơniăn, séa ngăn mâu kơpong long, a kĭng têa kroăng, têa plông ƀă mâu tíu ki tơ'lêi tơhnah tơhnâp vâ teăm  tŏng gum.

A mâu kơpong ki hiăng tro têa lân lu, tơnêi tơhnah tơhnâp môi tiah Quảng Sơn, D'ran ƀă Cát Tiên 3, khu râ pơkuâ cheăng châ xing xoăng gak ngăn, mơdât kuăn pơlê troh a kơpong ki rơ-iô, hbrâ rơnáu rơxế, plong, tuk, tơmeăm vâ tŏng xo, tŏng kum mâu ki trâm xía vâ. Krê a cheăm Cát Tiên 3 nếo djâ 25 rơpŏng kuăn pơlê lo ing kơpong ki tro têa rơlêa.