Klêi tăng ngăn, tối, khu râ pơkuâ cheăng kong pơlê Lâm Đồng hiăng tối hlo ai 109 to kông ki hiăng vâ tơ’nhiê ó kal rĕng ‘mâi rơnêu pro. Ki hên mâu kông mê xuân to a mâu cheăm kơpong hngế hngo, kơpong hdroâng kuăn ngo a mâu tơring Đức Trọng, Di Linh, Bảo Lâm, Đam Rông...

Tiô  pôa Hoàng Anh Tuấn, Kăn phŏ pơkuâ ngăn troăng prôk rơxế kơtâu kong pơlê Lâm Đồng, vâ tơniăn, ai tiô púi vâ rơxế ƀă mơngế prôk lăm, vâ chơ tơmeăm ƀă tơdroăng rêh ối dêi kuăn pơlê, malối tung rơnó mêi khiá, kong pơlê dế chêh tơdroăng pơkâ tăng liăn vâ ‘mâi rơnêu pro mâu kông hiăng vâ tơ’nhiê.  Vâ ‘mâi rơnêu pro mâu kông ki hiăng tơ’nhiê mê, kơxô̆ liăn kal ai dâng 965 rơtal liăn vâ pro kêi 109 to kông  mê.