Hneăng hôp kố mơdoh hên tơbleăng, tơpui ‘na tơdroăng pơkâ, troăng tơmiât pơhlêh ngiât, pêi chiâk deăng xúa kơmăi kơmok chal nếo dêi kong pơlê Lâm Đồng; tơmâng mâu khu ki pơkuâ ngăn, mâu khu ki rơkê plĕng tối ‘na mâu tơdroăng ki tơdjâk troh kơxô̆ liăn, túa pơkâ troăng hơlâ mơnhông mơdêk tung pơla pơhlêh xuân môi tiah rôh tơ’lêi dêi mâu khu ‘no liăn cheăng ƀă mâu tơdroăng tơkêa, mâu kế tơmeăm pơhlêh ngiât dêi kong pơlê.

Rơtế a mê mâu kăn xuân tơpui tơno ‘na tơdroăng liăn ngân ăm mơnhông ngiât, mơnhông krá tơniăn; mơnhông pêt kong ƀă troăng hơlâ pơhlêh túa rêh ối ăm pơlê pơla mâu hdroâng kuăn ngo a kong pơlê. Yăo sư, Tiê̆n sih Trần Hồng Thái, kăn hnê ngăn Vi ƀan kong pơlê Lâm Đồng tối rơdêi, hneăng hôp cho rôh tơ’lêi kân vâ kong pơlê mơđah tơbleăng ki ai hlâu, ki pơxúa ƀă mâu khu ki ‘no liăn cheăng troh ‘no liăn, tê mơdró a kong pơlê Lâm Đồng.

Kong pơlê kô pơtối tơmâng xo tâi tâng mâu rơkong tơpui, mơnhên dêi mâu khu ki rơkê plĕng, khu ki ‘no liăn cheăng, khu tê mơdró, tung tơdroăng mê ai pơkâ troăng tung la ngiâ mơdêk cheăng kâ rêh ối, pơhlêh ngiât krá tơniăn dêi kong pơlê Lâm Đồng tung la ngiâ.