Sap ing tơbleăng pêi hâi lơ 7/7 troh nôkố, kong pơlê Dak Lak ai 53 tơdroăng tơkêa bro, kế tơmeăm pro ki kal tá kơpong peăng mâ hâi Lâ châ tơbleăng xo tơnêi. Troh nôkố, 3 tơdroăng tơkêa hiăng pêi pro klêi tâi tâng tơdroăng ki xo tơnêi, 50 tơdroăng tơkêa châ lối pá xôp 90%. Tung kơxô̆ ki hiăng pêi klêi lối 90% ai mâu tơdroăng tơkêa bro ki kân, môi tiah troăng kân xŏn tơdrăng ăm rơxế kơtâu têi Khánh Hòa – Buôn Ma Thuột ai 3 tơdroăng tơkêa bro troăng prôk a kĭng têa kơxĭ Phú Yên.

Pôa Phạm Ngọc Hùng, Phŏ pơkuâ Khu ngăn chiâk deăng ƀă Hyôh kong prâi kong pơlê Dak Lak (ngế cheăng tung Tôh tí tăng ‘nâi plĕng) ăm ‘nâi, 5 tôh pêi cheăng xua Vi ƀan hnê ngăn kong pơlê mơjiâng hiăng teăm lêi tah hên tơdroăng ki xơpá, ton hơnăm. Cheăng xo tơnêi pơhlêh sap ing kơdrâ chiâng hbrâ rơnáu tiô pơkâ, mơdêk rĕng pơcháu tơnêi ƀă ‘no liăn chêl thiê̆n.