Roh kơ-êng tơkŭm po sap hâi lơ 3 troh 5/11. Mâu khu tơdroăng châ Kuô̆k hô̆i rah xo kơ-êng cho: Mơjiâng tơmeăm, Tơdroăng pơkuâ tơdroăng tung tơnêi têa, Tơdroăng kal tiô troăng hyôh rơ’jíu, um tơvi ƀă Internet, Tơdroăng séa ngăn. Mơ’nui roh kơ-êng, pôa Phạm Minh Chính, Ngế pro xiâm hnê ngăn Chin phuh kô mơnhên mâu tơdroăng tơdjâk ƀă tiâ rơkong kơ-êng dêi kăn teăng mâ Kuô̆k hô̆i. Mâu roh kơ-êng châ um tơvi, rơ’jíu mơ’no tơdrêng vâ mơngế tâ phĭu ƀă kuăn pơlê séa ngăn.

Pôa Trần Văn Lâm, Kăn teăng mâ, Kăn phŏ pơkuâ Khu râ kăn teăng mâ Kuô̆k hô̆i kong pơlê Bắc Giang, Kăn cheăng tung Vi ƀan pơkuâ liăn ngân – Hngêi arak liăn dêi Kuô̆k hô̆i.

Môi tơdroăng xiâm ki kal ki ê cho Kuô̆k hô̆i tơpui tơno ‘na tơdroăng pêi pro troăng hơlâ, luât ‘na pêi pro kơdĭng, hbrâ mơdât mơ’nhê tê kơtê hneăng hơnăm 2016 – 2021 ƀă tơdroăng tơkêa bro Luât tơnêi tơníu (‘mâi rơnêu). Pro tơ’lêi hlâu dêi tơdroăng tơkêa bro luât ai 16 chương, 245 troăng, tung mê rak 28 troăng; ‘mâi rơnêu, tơ’nôm 184 troăng; tơ’nôm nếo 41 troăng ƀă tah lôi 8 troăng.

Xuân tung măng tĭng pêi cheăng, Kuô̆k hô̆i tơpui tơno ‘na tơdroăng tơkêa bro Luât hbrâ, mơdât pêi lo liăn ki ‘mêi chiâng liăn ki lĕm (‘mâi rơnêu); tơdroăng tơkêa bro Luât hbrâ ‘na xivil; tơdroăng tơkêa bro Luât yă (‘mâi rơnêu); tơdroăng tơkêa bro Pơkâ tơbleăng tơdroăng pơkâ xiâm hneăng hôp Kuô̆k hô̆i (‘mâi rơnêu) ƀă hía hé.