Luâ 8 chôu kơxo hâi lơ 1 khế 7. A Tíu xiâm pêi cheăng dêi cheăm tơkăng kong Bờ Y, kong pơlê Quảng Ngãi hiăng ai 16 ngế lăm troh amê vâ pro mâu hlá mơ-éa, ki hên ai tơdjâk troh ‘na tơnêi tíu. Pôa Nguyễn Thanh Hùng, ngế ki châ pơcháu hnoăng cheăng pơkuâ ngăn ‘na hlá mơ-éa, tối ăm ‘nâi, cheăm Bờ Y, cho cheăm ki ai troăng tơkăng kong tơkoh ƀă 2 to kong têa Lếo ƀă Kul. Cheăm kố châ tơ’mot mâu cheăm: Pờ Y, Đăk Xú ƀă Plei Kần. Klêi kơ’nâi tơ’mot tơdjuôm, cheăm ki kố ai tơnêi tíu lối 240km2, pơ’leăng mâ mơngế ai lối 35.000 ngế. Tiu ki pêi cheăng a tíu xiâm ngăn ‘na pro hlá mơ-éa Plei Kần, tơring Ngọc Hôì, kong pơlê Kon Tum hdrối nah. Pôa Nguyễn Thanh Hùng tối ăm ngin ‘nâi:

“Tíu xiâm ngăn ‘na pro hlá mơ-éa kơnôm châ Đảng uỷ cheăm pơcháu 9 ngế kăn ƀô̆ ƀă mơngế ki cheăng. Tâi tâng mâu kăn ƀô̆ ki mê lo injg mâu cheăm Pờ Y, Đăk Xú ƀă Plei Kần hdrối nah troh pêi cheăng a Tíu xiâm chêh bro hlá mơe-éa dêi cheăm. Ngin hiăng pơcháu pơtân hnoăng cheăng pơkuâ ngăn mâu kơvâ cheăng ‘na Tơmeăm khoăng kong prâi, Chiâk deăng, cheăng kơmăi-mơdró kâ, mơjiâng hngêi trăng, Túa lĕm tro ƀă ‘na Luât rak ngăn ‘na kơxô̆ inâi, rơpŏng hngêi. Mâu vâi ki mê hiăng pêi pro tro tiô hiâm mơno kuăn pơlê pói vâ”.

Ki păng ‘nâng ăm hlo, tung pơla tơdah xo hnoăng cheăng, chêh bro hồ sơ ăm kuăn pơlê, kăn ƀô̆ cheăng a Tíu xiâm ngăn ‘na chêh bro hlá mơ-éa dêi cheăm Bờ Y hiăng mơdoh hên chôu phut vâ hnê mơhno, tŏng gum ăm kuăn pơlê chêh tơ’mot dêi tơdroăng xua ing tơdroăng ki pơhlêh inâi tơnêi tíu. Ối ai hên vâi krâ-nhŏng o dế ôh tá ‘nâi dêi tơná dế ối tung cheăm ki lâi dêi kong pơlê Quảng Ngãi. Pôa Hoàng Hữu Sửu troh a cheăm pro dêi hlá mơ-éa vâ xing xoăng ăm dêi 2 ngế kuăn, tối mơnhên, apoăng pôa xuân tá hâi teăm ‘nâi nhên ‘na tơdroăng kố. Laga, pôa rĕng lăm troh vâ pêi pro hlá mơ-éa, kơnôm mâu kăn ƀô̆ veăng hnê tối, la hlo túa pêi cheăng dêi mâu kăn ƀô̆, mơngế cheăng a cheăm kố kơhnâ, krâu, rĕng tơdrêng.

“Roh apoăng ngế ki lâi xuân chiâng xêk xêng iâ, xua ga ing kong pơlê Kon Tum mê nôkố hiăng chiâng kong pơlê Quảng Ngãi. Hdrối nah ai 3 râ, kong pơlê, tơring, cheăm, mê nôkố bu ối 2 râ, cho kong pơlê ƀă cheăm xo. Kơxo kố âi, á lăm bro hlá mơ-éa hlo xuân rĕng tơ’lêi. Mâu vâi ngoh nâ ki cheăng tung kơ koan pêi cheăng kơhnâ, phiu ro, tơdah ƀă hnê tối chôa ‘lâng ăm kơ ngin”.

Vâ thăm tơ’lêi hlâu ăm kuăn pơlê, tơdrêng ƀă tơdroăng pơtâng tối ki nếo ‘na tíu pêi cheăng dêi cheăm ki nếo, ing tơdroăng hnê tối, tơbleăng nhên troh a vâi krâ-nhŏng o ƀă ing măng Facebook, Zalo a hâi ki pêi cheăng apoăng mê hlối. Vi ƀan hnê ngăn mâu cheăm pơrá pơcháu mâu kăn ƀô̆ koh tơdah, hnê mơhno tối ăm kuăn pơlê vâ pro hlá mơ-éa a tíu pêi cheăng ki nếo.

Klêi kơ’nâi tơ’mot kong pơlê Kon Tum, Quảng Ngãi ai 9 to cheăm ối kơpong tíu tơkăng kong, tơkoh ƀă 2 to kong têa Lếo ƀă Kul, ai troăng tơkăng kong xŏn lối 292km. 9 to cheăm tơkăng kong dêi Quảng Ngãi.