VOV4.Xơ Đăng - Tơdah vâi hdrêng vêh hngêi trung hriâm sap ing tơdế khế 2/2022, mâu tíu ki hnê mầm non a pơlê kong kơdrâm Plei Ku, kong pơlê Gia Lai dế pơtối tơbleăng hên troăng hơlâ vâ rak vế tơniăn hbrâ mơdât pơreăng COVID-19. Rơtế amê, mâu tíu pêi cheăng hnê tối, mơhnhôk mâu nôu pâ djâ dêi kuăn troh hngêi trung, ‘mâi mơnhông tơdroăng rêh ối tiah hmâ nếo. Khu ngăn hnê hriâm ƀă hnê mơjiâng tuăn ngoâ rơkê Gia Lai ăm ‘nâi, nôkố, lâp kong pơlê ai 253/257 tíu hnê vâi hdrêng mầm non ki hriâm tơkŭm.

Vâi hdrêng mầm non truâ kên pâng môh tung plâ hriâm, tâp

Vâ chê 1 măng tĭng, hiăng ai 87% ngế hdrêng troh hngêi trung. Ngăn tơdjuôm, a mâu tơring, pơlê kong krâm, kơxô̆ vâi hdrêng mầm non vêh hriâm hngêi trung hên. Ƀă tơdroăng ki hnê hriâm rak tơniăn, kơxô̆ vâi hdrêng vêh hngêi trung dế châ mơdêk tiô kơ rêm hâi. Tiô Khu ngăn hnê hriâm, râ mầm non cho râ hriâm ki kal, kum vâi hdrêng hlê plĕng tung tâi tâng, hlê plĕng ƀă mơnhông ‘na hiâm mơno loi tơngah ăm hdrêng hdrối vâ mot hriâm lâm 1. Xua mê, tơdroăng ki ăm hdrêng rĕng vêh hngêi trung hriâm cho tơdroăng ki kal khât.

Katarina Nga tơplôu ƀă tơbleăng