Mâu hâi ki kố, Kuân đoân 34 (Khu xiâm ngăn lêng) dế tơbleăng pro 100 toăng hngêi ăm mâu rơpŏng kuăn pơlê a Gia Lai ƀă Dak Lak ki ai tơ’nhiê tung rôh kong mê khía mơhot têa kân lân lu pơla hdrối nah, tung mê 70 toăng a Gia Lai ƀă 30 toăng a Dak Lak.

Klêi kơ’nâi tơdah xo tơdroăng pơkâ thế, lối 600 ngế kăn ƀô̆, mố đô̆i rơtế ƀă hên rơxế, tơmeăm hiăng pơtroh troh a cheăm bêng, xoăng ngế ki pơkuâ tơrêm tơdroăng, tơrŭm krá tơniăn ƀă kăn pơkuâ cheăm bêng ƀă rơpŏng kuăn pơlê vâ rĕng lăm ngăn, chêh pro túa pơkâ ƀă tơkŭm pro, rak vế tro kih thuât, tơniăn ƀă rĕng; Đăi tă Phạm Hồng Sơn, phŏ pơkuâ hnê ngăn Đảng lêng Hngêi trung lêng Kuân đoân 34 ăm ‘nâi, tâi tâng mâu lêng, tá mâu ngế ki cheăng tung khăm pơlât dêi tíu pêi cheăng, pơrá châ pơtroh troh vâ rak ngăn ivá mố đô̆i ƀă tơƀrê tung tơdroăng cheăng. Kuân đoân 34 pơkâ pro klêi mâu toăng hdrối hâi hâi lơ 20/1/2026, vâ gum kuăn pơlê rĕng tơniăn rêh kâ ối ƀă teăm ai hngêi nếo vâ tơdah Têt phâi hơtôu.