Nếo achê pơla kố, a pơlê kong kơdrâm Đà Lạt, Khu xiâm Đoân Droh rơtăm Kong san Hồ Chí Minh tơrŭm cheăng ƀă Khu kăn pơkuâ hnê ngăn Đảng, Vi ƀan hnê ngăn kong pơlê Lâm Đồng tơkŭm po Leh diâp Pri Lương Định Của roh má 17 ƀă diâp Pri mơgêi hneăng tơ’noăng tơkêa bro pơxiâm tăng cheăng pêi dêi khu droh rơtăm thôn pơlê hơnăm 2022. Klêi 17 hơnăm tơkŭm po, Pri Lương Định Của hiăng pơ-ô 2 rơpâu 50 ngế ‘’pêi chiâk deăng rơkê’’. Ƀă hơnăm kố, pri châ pơcháu ăm 32 ngế droh rơtăm ki djâ troăng ahdrối tung kơdo mơ-eăm pro kro mơdrŏng ƀă ai hnoăng ki kân tung lâp tơnêi têa.

Xông tơpui a hâi leh, pôa Trần Tuấn Anh, Ngế cheăng tung khu xiâm kal kí, Kăn pơkuâ ngăn ‘na cheăng kâ tơnêi têa hiăng mơhno tối tơdroăng ki hơniâp ro ‘na tơdroăng rế hía hlo ai rế hên khu mơdró kâ, Khu pêi cheăng tơrŭm, mâu chiâk deăng dêi khu hơnăm ối nếo, mâu túa ki tơrŭm cheăng mơnhông pêi cheăng kâ tung chiâk deăng, thôn pơlê rĕng chiâng mâu túa ki djâ troăng ahdrối a mâu kong pơlê, kơpong ƀă tung lâp plâi tơnêi.

Tung mâu troăng tơdjâ ki vâ tơdah xo Pri Lương Định Của dêi hơnăm 2022, hên mâu pú hơnăm ối nếo pêi châ lối 30 rơtal liăn ƀă xuân ai mâu ‘nâ châ 706 rơtal liăn, ki tơkâ rêm hơnăm châ dâng rơtal liăn. Ki rơhêng vâ tối, hên mâu vâi droh rơtăm cho hdroâng kuăn ngo rêh ối a mâu pơlê cheăm xahpá la ƀă tuăn mơno hnối ai tá tơdroăng kơdo mơ-eăm hiăng chiâng kro mơdrŏng ki tơxâng, chiâng mâu ngế ki pêi lo hên kế tơmeăm, liăn ngân.

Kố cho mâu ngế ki kơhnâ rơkê khât tung mâu tơdroăng cheăng dêi droh rơtăm tơ’noăng pêi chiâk pêi deăng, tê mơdró kâ rơkê, khu rơxông nếo veăng ‘no dêi hiâm mơno, ivá mơjiâng thôn pơlê nếo a pơlê cheăm. Ƀă mâu túa cheăng, túa pêi pro ki nhên hiăng mơhnhôk hên hĕng khu râ droh rơtăm a thôn pơlê kơhnâ khât tung tơ’noăng pêi cheăng kâ, pêi chiâk pêi deăng mơnhông chiâng kro mơdrŏng.

Pôa Trần Tuấn Anh ai tối tiah kố:

“Pin tơkŭm po hneăng pơ-ô mâu vâi pêi chiâk hơnăm ối nếo ki rơkê, xua vâi cho mâu reăng ki tơpo lĕm tơ-eăng tung lối rơtuh ngế droh rơtăm ki rơkê kơhnâ dế hâi măng veăng ‘no dêi ivá mơno rơxông nếo, tuăn mơno, khên tơnôu, kâi chân, kơdo mơ-eăm, kơhnâ khât ăm tơdroăng mơnhông pêi chiâk pêi deăng, mơjiâng thôn pơlê nếo.

Á loi tơngah tiah kố, ƀă tơdroăng ki hâk mơnê, hâk tơngăm dêi rêm ngế vâi rơxông nếo châ tơdah pri hâi kố, kô pơtối châ bâ eăng, mơhno djâ troăng troh a kơdrâm kơdrĕng mâu đoân viên, droh rơtăm a mâu pơlê cheăm, tíu pêi cheăng, veăng kum kal khât tung thăm mơdêk mâu tơdroăng tơ’noăng pêi chiâk pêi deăng, mơdró kâ rơkê, mơjiâng thôn pơlê nếo ki ai hên hvêa chêng prôk ó rơdêi tâ tung la ngiâ’’.

Pôa Trần Tuấn Anh xuân ai pâ thế tiah kố, mâu râ Đảng, khu kăn pơkuâ, rêm khu pơkuâ cheăng kal athế tŏng kum hên tâ nếo troh khu vâi droh rơtăm ƀă hnoăng cheăng dêi droh rơtăm, veăng kum ƀă tŏng veăng lĕm tro má môi vâ khu rơxông nếo tung lâp tơnêi têa ƀă khu pơkuâ ngăn Đoân tối tơdjuôm, khu droh rơtăm thôn pơlê tối krê pleăng dêi hnoăng cheăng, ivá mơno, ki rơkê plĕng, djâ troăng prôk ahdrối veăng mơhông pêi cheăng kâ, mơnhông rêh ối, pêi pro ƀlêi chiâng hnoăng cheăng kơmăi kơmok, pêi pro tiô chal nếo mơdêk ăm tơnêi têa, ƀă tơdroăng pêi chiâk deăng, tơdroăng rêh ối thôn pơlê.

A roh leh mê, 32 ngế droh rơtăm ki djâ troăng ahdrối hiăng châ rah xo ing 81 hồ sơ dêi 45 Khu pơkuâ ngăn Đoân Droh rơtăm kong pơlê, pơlê kong kân tung lâp tơnêi têa châ diâp Pri Lương Định Của hơnăm 2022. Khu tơkŭm po hiăng diâp pri ăm 9 tơdroăng tơkêa bro ki rơkê má môi, tung mê, ai 1 pri má môi, 2 pri má péa, 3 pri má pái ƀă 3 pri mơhnhôk, tung tâi tâng 31 tơdroăng tơkêa bro ki veăng tơ’noăng mơgêi Hneăng tơ’noăng pơxiâm tăng cheăng pêi khu droh rơtăm thôn pơlê hơnăm 2022.

Xuân ai tơdjâk troh mâu tơdroăng ki pơxiâm tăng cheăng pêi ăm droh rơtăm thôn pơlê, tung măng tĭng hdrối, Khu droh rơtăm Việt Nam kong pơlê Dak Lak hiăng tơkŭm po mâu lâm hnê hriâm vâ mơnhông mơdêk ki rơkê plĕng, xúa khoa hok kŏng ngê̆ ‘mot tung pêi cheăng ƀă tê mơ’no mâu kế tơmeăm ăm vâi droh rơtăm cho hdroâng kuăn ngo.

Veăng hriâm ai lối 100 ngế droh rơtăm hdroâng kuăn ngo ki dế pêi chiâk deăng, tê mơdró tung kơvâ chiâk deăng ƀă kăn ƀô Khu tơrŭm pơkuâ droh rơtăm pơlê cheăm dêi mâu kong pơlê.

Mâu ngế ki hriâm châ pơtâp mâu tơdroăng ki rơkê ‘na ki tơrŭm pêi pêt, troh a ‘măn rak, tê mơdró mâu tơmeăm, ki hlê plĕng tung pơkuâ rak ngăn kế tơmeăm, troh a tê kế tơmeăm, túa tơpui kâ, túa ki tơbleăng tê kế tơmeăm. Hriâm pêi pro rơhí rơhó mâu tơrŭm cheăng, ing mơjiâng trang măng Internet ƀă tê kế tơmeăm tung măng.

Ngoh Y Lê Pas Tơr, Kăn hnê ngăn Khu pêi cheăng tơrŭm ngăn droh rơtăm Việt Nam kong pơlê Dak Lak tối ăm ‘nâi, kố châ ngăn cho hnoăng cheăng pêi pro tiô tơdroăng pơkâ dêi Khu xiâm ngăn droh rơtăm Việt Nam cho vâ veăng kum ăm khu droh rơtăm hdroâng kuăn ngo a kong pơlê thăm hlê plĕng nhên, ki rơkê plĕng, ki tơtro ƀă khoa hok kih thuât tung pêi chiâk, pêi deăng, veăng kum mơnhông pêi cheăng kâ, pêi lo kế tơmeăm.

‘’Tung pơla pêi chiâk pêi deăng dêi khu droh rơtăm a kong pơlê Dak Lak ai túa xúa khoa hok kŏng ngê̆ xuân môi tiah xúa mâu tơdroăng khoa hok kŏng ngê̆ mot tung pêi chiâk deăng xuân u ối hên tơdroăng ki tá hâi teăm tro păng ‘nâng. La tơdroăng ki mơhno tối ‘na rơkê plĕng ai tơdjâk troh xúa mâu ki rơkê plĕng ‘na khoa hok kŏng ngê̆ ƀă tung pêi chiâk deăng ăm khu droh rơtăm cho mâu hnoăng cheăng ki pêi ahdrối.

Khu pơkuâ hnê ngăn Đoân rơtế veăng pêi hnoăng cheăng kum tăng cheăng pêi, ki rơhêng vâ tối cho tơdroăng ki rơtế prôk ƀă mơngế pêi cheăng tung mơjiâng xêh hnoăng pêi kâ, tơdroăng mơnhông krê dêi xêh tơdroăng cheăng tơná’’.