Tây Nguyên ai kong prâi, tơnêi tơníu ƀă nhâ loăng, kong kế hên, cho tơdroăng ki tơ’lêi hlâu vâ hriăn plĕng, mơjiâng hên khu pơkeăng, tung mê ai mâu loăng plâi ki tơtro pá kơdâm kong. Tíu pêt mơjiâng klêi tơmot chiâng môi xuân po tơ’nôm rôh tơ’lêi tơdjêp kơpong ki pêt ƀă tíu uâ pro ƀă kơchơ mơdró. Pakĭng sâm Ngọc Linh ƀă Hồng Đẳng Sâm hiăng châ mơnhên, mâu cheăm bêng kal pơtối rak xo loăng pơkeăng ki kơnâ cheăng kâ, tơtro ƀă tơnêi kong prâi, rak tơniăn xiâm gen ƀă tơkŭm po pêt mơjiâng ƀă tơdroăng kal vâ tê.

Vâ mơhnhôk cheăng kâ ‘na mơnhông pêt pơkeăng, kal tŏng gum hdrê, kih thuât ƀă tơdjêp rôe; tơdrêng mơnhên inhên hnoăng ki pơxúa, ví hnoăng pơla pơlê pơla, khu pơkuâ kong ƀă khu tê mơdró. Jâ Nguyễn Thị Thu Hà, Kăn pơkuâ Tơdroăng tơkêa bro dêi Grup pơkuâ Trường Sinh tối, pơkeăng Tây Nguyên hiăng ai môi kơpong pơkeăng kân laga tá hâi ai hên ‘na khu pơkeăng ƀă pơtê to a pêt mơjiâng tá hâi bro cho ki xiâm. Khu tê mơdró pói vâ mơjiâng tơ’nôm hên kơpong ki pêt ƀă hên khu pơkeăng tâ, tơdjêp ƀă uâ bro trâu:

“Ngin kô ôh tá pơtê pêt mơjiâng tá hâi bro mê thế mơjiâng pro, uâ bro hên troăng mâu tơmeăm môi tiah pơkeăng, nhâ loăng pơkeăng ki vâ mơjiâng pro pơkeăng lơ tơmeăm rak vế ivá kô chiâng hơ’lâk, tơvât a tơmeăm ki ê. Ôh tá xê to mâu tơmeăm xúa troăng ôu, pin kô chiâng mơjiâng tơmeăm ki rak ngăn ivá châ chăn’’.

Hên kăn teăng mâ veăng hôp tơpui tơno tối, ing pơkâ mơ’no liăn cheăng troh kơpong pêt mơjiâng châ tơƀrê ối hên tơdroăng ki thế tơxâng. Ahdrối, cheăm kal séa ngăn, pro mơ-éa kơpong ki ai tơmeăm, mơnhên inhên ngế pơkuâ kong, tơdroăng tơnêi kong prâi, hngêi trăng troăng klông ƀă tíu tê; rêm kơpong kal ai troăng rak vế kong, séa ngăn tơdjâk troh vêh mơjiâng kong kế, tơnêi tơníu ƀă kơnhŏng têa.

Rơtế amê cho mơnhên tơmeăm ƀă kơchơ mơdró pơkâ ahdrối rah xo cho kŏng ngê̆, tơkŭm po kơpong pêt; tơmeăm thế châ mơnhên ‘na inâi, mâu inâi tơmeăm hŏa hok, pơkâ ki tơniăn ƀă ti tăng xiâm tiô lô. Pôa Đoàn Ngọc Có – Phŏ Kăn pơkuâ ‘na Chiâk deăng ƀă Kong prâi Gia Lai tối ăm ‘nâi:

“Troh hơnăm 2030, tơdroăng tơkêa bro pêt mơjiâng loăng pơkeăng pá kơdâm kong châ dâng 31.000 hectar. Ki kơnâ dêi pơkeăng Việt Nam cho hên. Laga, tơdroăng pêt mơjiâng pơkeăng pơkâ thế tơdjêp ƀă tơmeăm, têng, uâ bro ƀă tăng tíu tê mơdró nếo mơnhông mơdêk lĕm’’.

Ing mâu rơkong tơpui, pơkâ a hôp tơpui tơno, pơkâ cho Tây Nguyên kal mơnhên ngăn kơpong pêt tơtro, rah xo troăng pêi ki chiâng pêi pro ahdrối vâ po rơdâ; tơdrêng amê, mơnhông pêt mơjiâng pơkeăng pá kơdâm kong kal ai tơdroăng ki veăng dêi khu mơ’no liăn cheăng ai liăn ngân, kŏng ngê̆ ƀă troăng tíu tê inhên. Ing mê, mơjiâng tơmeăm pơkeăng ki kơnâ, gum mơdêk pêi lo liăn dêi kuăn pơlê, mơjiâng xiâm kối ăm rak ngăn kong ƀă mơjiâng pơkeăng ton xŏn.