Pêi pro Pơkâ 60, hâi lơ 12/4/2025 dêi Rôh hôp má 11 Khu pơkuâ ngăn xiâm Đảng hneăng 13, pái to kong pơlê Lâm Đồng, Dak Nông ƀă Bình Thuận tơkŭm chiâng môi tíu pêi cheăng râ kong pơlê ƀă xo inâi cho kong pơlê Lâm Đồng, tíu xiâm cheăng kal kí pro a kong pơlê Lâm Đồng nôkố. Vâ rĕng pro klêi mâu túa pơkâ tơkŭm kơ koan, rak tơniăn tơdâng tơ’mô, tơdroăng cheăng pêi tơƀrê ƀă kơdĭng mâu liăn ngân, Vi ƀan hnê ngăn kong pơlê Lâm Đồng pơkâ thế mâu khu râ, kơvâ cheăng dêi kong pơlê pơkuâ, tơrŭm ƀă mâu tíu pêi cheăng dêi péa to kong pơlê Bình Thuận ƀă Dak Nông vâ pro tơdroăng tơkêa tơkŭm.

Tơdroăng tơkêa athế pêi pro tro tiô pơkâ dêi kong pơlê, klêi ƀă pơtroh ăm Khu ngăn tơring cheăm ƀă hnoăng cheăng mâu kăn ƀô̆ kong pơlê Lâm Đồng kĭ, tơkŭm hdrối hâi lơ 22/4 la ngiâ. Klêi kơ’nâi tơkŭm pái to kong pơlê Lâm Đồng, Bình Thuận ƀă Dak Nông, kong pơlê Lâm Đồng ai tâi tâng ƀăng tơnêi 24.233 km2, pơ’leăng mâ mơngế vâ chê 3.300 ngế.