Hâi lơ 18/4, Rôh hôp mơnhông hnê hriâm – hnê cheăng pêi kơpong Đông Nam bộ troh hơnăm 2030 troăng ngăn troh hơnăm 2045 ƀă tơbleăng pêi pro Tơdroăng pơkâ kơxô̆ 24 dêi Khu xiâm pơkuâ tơdroăng kal kí ‘na mơnhông kơpong Đông Nam bộ po a Bình Dương, xua Khu xiâm ngăn hnê hriâm ƀă hnê mơjiâng tuăn ngoâ rơkê tơkŭm po.

Veăng hôp ai pôa Trần Hồng Hà, Ngế pro xiâm phŏ hnê ngăn Chin phuh, rơtế ƀă kăn pơkuâ mâu khu xiâm, kơvâ cheăng tơnêi têa. Tơpui hnê mơhno a rôh hôp, pôa Trần Hồng Hà, Ngế pro xiâm phŏ hnê ngăn Chin phuh tối nhên, Đông Nam Bộ cho tíu xiâm mơnhông, cho tíu xiâm kân má môi ‘na mâu kơvâ cheăng, tơdroăng kố ai tơdroăng veăng kum kân dêi khu xiâm ngăn hnê hriâm, hnê cheăng pêi. Ngế pro xiâm phŏ hnê ngăn Chin phuh pơkâ thế Khu xiâm ngăn hnê hriâm ƀă hnê mơjiâng tuăn ngoâ rơkê tơrŭm ƀă mâu khu xiâm kơvâ cheăng, kong pơlê rơtế hriăn ngăn ‘na mơnhông hnê hriâm ƀă hnê cheăng pêi tiô tơdroăng pơkâ 24 dêi Khu xiâm pơkuâ tơdroăng kal kí.

Ing mê, pơkâ nhên ‘na mơnhông tơdroăng hnê hriâm hnê cheăng pêi, tơtro ƀă tơdroăng ki xiâm dêi rêm kong pơlê tung kơpong Đông Nam Bộ; kal mơjiâng a kố mâu tíu xiâm hnê đăi hok, lối tâ đăi hok, ‘no liăn cheăng tung mâu kơvâ cheăng ki nếo, mơjiâng bro mâu tíu xiâm hơ’lêh nếo rơkê.