Thôn 17 nôkố hiăng châ tơdjêp ƀă tíu xiâm cheăm Ea Ning, lo a tơring Čư̆ Kuin ƀă troăng ƀê tong ki kân rơdâ, troăng prôk ai pul on bâ eăng a kong măng. Tiô pôa Nguyễn Văn Bá, môi ngế kuăn pơlê a thôn 17, troăng kố châ bro mê sap ing tơdroăng ki tơdjuôm ivá veăng kum dêi rêm ngế ‘na liăn rơnêu, pleăng tơnêi ƀă hên hâi pêi cheăng. Tơdroăng môi hiâm mơno, tơrŭm dêi kuăn pơlê thôn 17 xuân kum gâk kring tơniăn châ rak vế, ‘na pơlê cheăm nhŏng o rế hía rếa krá tơniăn tâ, tơdroăng ki tong hơ’vĕng kế tơmeăm, ko ‘nhiê loăng pêt hiăng ôh tá ai xếo.

Pôa Nguyễn Văn Bá ăm ‘nâi, vâi krâ nhŏng o tung thôn nôkố hiăng hmiân tuăn pêi cheăng kâ.

“Hdrối nah, kố cho tíu ki ôh tá tơniăn, tŭm túa mâu tơdroăng ki pro xôi tá troh tơdroăng ki tong hơ’vĕng, ma tŭi, tong xo kế tơmeăm xuân ai. La sap ing hâi ki tơbleăng tâi tâng kuăn pơlê pêi pro tro hnoăng cheăng gak kring ƀă rak vế thôn, pơlê, gak kring Tơnêi têa mê châ tơdroăng ki môi tuăn dêi tâi tâng kuăn pơlê akố, ngin hiăng kâi hbrâ mơdât tơdroăng ki pro ôh tá tơniăn tung pơlê pơla a kơpong kố rế hía rế kơdroh hên.

Ki xiâm cho thôn trưởng pôa Mao rế ai hiâm mơno pôu râng dêi hnoăng cheăng, rế ai tơdroăng ki hlê plĕng, hnoăng cheăng rak ngăn, mơjiâng mâu tơdroăng tơ’noăng tá troh tơbleăng tơniăn lĕm a thôn pơlê, gak kring tơniăn tơrêm thôn”.

Pôa Mao ki pôa Nguyễn Văn Bá tối troh cho Lê Xuân Mao, kăn thôn 17 sap ing hơnăm 2014, drêng Kŏng an kong pơlê Dak Lak rah xo tíu kố pro túa pơkâ xiâm Kơpong kuăn pơlê rêh ối tơniăn, ôh tá ai mâu tơdroăng pro xôi tung pơlê pơla”. Vâ tơdroăng ki mơjiâng kố rĕng hlo mâu tơdroăng tơƀrê, pôa Lê Xuân Mao hiăng tí tăng ‘nâi plĕng ăm khu râ Đảng, khu kăn pơkuâ tơkŭm po mâu rôh hnê tối, trâm mâ, tơpui tơno ƀă kuăn pơlê, pro pơlĕm mâu tơdroăng ki ôh tá môi tuăn dêi rơpó, mơdêk tơdroăng tơrŭm, ‘mâi mơnhông tơdroăng tơrŭm pơla pơlê cheăm, pro hơ’lêh mâu ngế ki pro ôh tá tro mâu tơdroăng.

Pôa Lê Xuân Mao chôu vế:

“Ngin tơkŭm mơjiâng túa pơkâ Kơpong kuăn pơlê rêh ối tơniăn, ôh tá ai tơdroăng ki pro xôi ƀă ôh tá tro tung pơlê pơla, troh nôkố châ 8 hơnăm. Ngin hmâ tơkŭm po hôp kuăn pơlê, hnê tối ăm kuăn pơlê ‘na rak vế gâk kring Tơnêi têa, tơkéa vâ tối cho rêm ngế kuăn pơlê cho môi ngế lêng kŏng an. Má péa, cho ai 5 Tôh tơrŭm tung thôn mê rêm tôh tơrŭm cho môi tôh ƀơrô, hbrâ mơdât mâu ngế pro xôi.

Ngin hnê tối, tơkŭm po ‘na hnoăng cheăng gâk kring, rak tơniăn, mê ah mơdêk ki hlê plĕng dêi kuăn pơlê vâ rêh ối ƀă dêi rơpó hơniâp ro tâ ƀă pêi pro tro hnoăng cheăng vâ rak vế tơniăn”.

Klêi kơ’nâi hnê tối, tơbleăng, troh nôkố, kuăn pơlê thôn 17 hiăng pơcháu 5 toăng hnêa ki vâi bro xêh, kum veăng pro chiâng lĕm 12 ngế rơtăm hmâ pro xôi luât ƀă tơhrâ ôh tá vêh pro xôi xếo. Khu rak ngăn thôn pơtối lăm pơtrui, châ hlo ƀă veăng hbrâ mơdât 34 ngế rơtăm tơxiăn dêi rơpó, thế pơtê ƀă 23 ngế droh rơtăm ki tơkŭm ối dêi ƀă rơpó pro ôh tá tơniăn, ing rơpŏng vâ mơhnhôk hnê khĕn ƀă rak ngăn pôi tá ăm mâu rơtăm pro xôi luât.

Krê pôa Mao xuân tơrŭm ƀă khu lêng Kŏng an cheăm tơleăng 14 ngế ki mơhnŏng bro xía vâ, pơlĕm 20 rôh ôh tá môi tuăn tung kuăn pơlê, veăng châ hlo, pơsăm tối 5 rôh xah ƀai kâ liăn, tơbleăng ăm Kŏng an cheăm 12 tơdroăng ki kơnía kum hnoăng cheăng séa ngăn tơdroăng xôi.

Kơnôm mê, sap ing kong pơlê ki ai tơdroăng gâk kring ôh tá tơniăn, troh nôkố, thôn 17 hiăng rế hía rế chiâng kơpong tơniăn, ôh tá ai xếo ngế ki pro xôi. Đăi ŭi Bùi Văn Trọng, ngế ki pơkuâ Kŏng an cheăm Ea Ning, tơring Čư̆ Kuin mơnhên tối, túa pơkâ kơpong kuăn pơlê rêh ối tơniăn, ôh tá ai ngế ki pro xôi tung pơlê pơla a thôn 17 hiăng mơdêk ki tơƀrê tung rak vế gâk kring tơniăn, gâk kring tơdroăng rêh ối kuăn pơlê a cheăm.

“Ƀă ki tơƀrê dêi túa pơkâ mê xuân cho tơdroăng ki mơnhên tối khât hnoăng cheăng dêi pôa Lê Xuân Mao, kăn pơkuâ tiêuh ƀan, mê cho mơdêk hiâm mơno pôu râng dêi hnoăng cheăng tung hnoăng cheăng rak tơniăn gâk kring, tơniăn a thôn 17 xuân môi tiah cho tíu dêi tâi tâng cheăm. Pôa kơhnâ khât tung hnoăng cheăng, ai hên ivá veăng kum hên ăm kŏng an cheăm xuân môi tiah cho khu kăn pơkuâ cheăm tung hnoăng cheăng rak vế gak kring tơniăn.

Ing tơdroăng ki pêi pro mê thôn 17 mê Kŏng an cheăm xuân hiăng po rơdâ châ 2 túa pơkâ a thôn 24 ƀă thôn 22 cheăm Ea Ning”.

Sap ing mơ’nui hơnăm 2021, pôa Mao pơtê pro ngế pơkuâ thôn 17, hơ’lêh pêi cheăng pro kăn hnê ngăn Khu mơngế hơnăm hiăng krâ ƀă Khu ngăn mâu ngế ki tro trếo ‘mêi dioxin cheăm Ea Ning. Pôa xuân dế cho kăn hô̆i đong hnê ngăn râ tơring ƀă ngế cheăng tung Vi ƀan măt trâ̆n tơnêi têa Việt Nam tơring Čư̆ Kuin.

Hiăng 65 hơnăm, la pôa xuân ối pêi dêi hnoăng cheăng tung thôn, mơdoh hên chôu phut lăm pôu kơ-êng mơhnhôk mâu ngế ki pêi pro klêi hnoăng kroăng phâk ƀă vêh dêi pơlê mot tơrŭm ƀă pơlê pơla, hnê pơchân vâi mơ-eăm pơ’lêh dêi hiâm tuăn pêi cheăng kâ, pôi tá pơtối pro xôi xếo.

Ƀă mâu ivá veăng kum mê, pôa Lê Xuân Mao châ kuăn pơlê loi nhuô̆m, hâk vâ, pơtối châ cho hlá mơ-éa khĕn kơdeăn, ƀâng khĕn kơdeăn dêi Vi ƀan hnê ngăn kong pơlê ƀă kăn pơkuâ Kŏng an kong pơlê Dak Lak. Nếo achê kố, pôa Mao hâk tơngăm cho môi tung 15 ngế ki djâ troăng ahdrối tung lâp tơnêi têa châ ngế xiâm ngăn Kŏng an diâp ƀâng khĕn kơdeăn xua ai hên ivá veăng kum ăm hnoăng cheăng hbrâ mơdât ƀă tơdroăng tơ’noăng Tâi tâng kuăn pơlê rak vế Tơnêi têa hơnăm 2022.