Vâ chê 9 hơnăm hdrối, Hngêi pơkeăng Chợ Rẫy – Phnom Pênh – cho tơmeăm ki tơrŭm cheăng apoăng tung kơvâ khăm pơlât châ tiô pơkâ rơkê plĕng nôkố, hngêi pơkeăng hiăng kum pêi pro mâu tơdroăng ki rơhêng vâ khăm pơlât dêi kuăn pơlê Kul tối tơdjuôm ƀă kuăn pơlê pơlê kong xiâm Phnom Pênh tối krê.

A rôh pêi cheăng ƀă kăn pơkuâ hngêi pơkeăng, pôa Phạm Minh Chính, Ngế pro xiâm hnê ngăn tơnêi têa pin tơmâng xo ƀă khĕn kơdeăn mâu ivá mơ-eăm dêi mâu khu ki ‘no liăn cheăng, khu ƀok thái pơkeăng, mâu ngế cheăng ‘na khăm pơlât dêi Việt Nam ƀă Kul a Hngêi pơkeăng Chợ Rẫy – Phnom Penh.

Klêi mê, xuân pói rơhêng vâ, mâu khu ki ‘no liăn cheăng, khu ƀok thái pơkeăng, mâu ngế cheăng ‘na khăm pơlât Việt Nam a hngêi pơkeăng Chợ Rẫy – Phnom Pênh pơtối mơnhên ngăn ki pơxúa kal kí dêi hngêi pơkeăng kố; mơ-eăm tâ nếo tung hnoăng pêi klêi tơdroăng cheăng ki kơnía tá rak ngăn ivá ăm kuăn pơlê Kul.