Kơxo lơ 14/11, Ngế pro xiâm hnê ngăn kong têa New Zealand cho jâ Jacinda Ardern troh a Hà Nội, pơxiâm roh lăm pôu pêi cheăng Việt Nam sap hâi lơ 14 – 17/11 tiô rơkong krếo thế dêi pôa Phạm Minh Chính, Ngế pro xiâm hnê ngăn tơnêi têa.

Tiô tối hdrối tung roh lăm pôu pêi cheăng, jâ Jacinda Ardern, Ngế pro xiâm hnê ngăn kong têa New Zealand  kô veăng Leh tơdah păng ‘nâng, tơpui tơno ƀă pôa Phạm Minh Chính; trâm mâ khu chêh hlá tơbeăng; koh trâm tơpui tơno pôa Nguyễn Phú Trọng, Kăn xiâm pơkuâ hnê ngăn Đảng; trâm mâ tơpui tơno ƀă pôa Nguyễn Xuân Phúc, Kăn xiâm hnê ngăn tơnêi têa ƀă pôa Vương Đình Huệ, Kăn xiâm hnê ngăn Kuô̆k hô̆i; Veăng tơpui tơno khu tê mơdró Việt Nam – New Zealand; veăng tơdroăng kal tơdjêp pêi chiâk deăng New Zealand rơtế mâu tơdroăng pêi ki ê.

Roh lăm pôu pêi cheăng Việt Nam dêi Ngế pro xiâm hnê ngăn kong têa New Zealand  kô kum thăm loi tơngah kal kí, thăm tơrŭm cheăng tung hên kơvâ cheăng pơla péa tơnêi têa môi tiah kal kí – tơpui kâ ƀă kong têa ê, cheăng lêng – gâk kring, cheăng kâ, mơ’no liăn cheăng, pêi cheăng, hnê hriâm, kŏng ngê̆, kong prâi hơ’lêh, pơ’lêh pêi cheăng xúa kŏng ngê̆.