Tiô pơkâ, Khu xiâm ngăn kong pơlê, tơring, cheăm ƀă hnoăng cheăng mâu kăn ƀô̆ kô pơkâ troăng hnê mơhno túa ki klâ xoăng ‘mot tơkŭm tíu pêi cheăng, séa ngăn tâi tâng kơ koan cheăng tơnêi têa, xoăng kăn ƀô̆ tro tơdroăng ki iâ, pêi cheăng xêt tơƀrê, rak vế tơdroăng ki pêi cheăng tơdjuôm. Mâu túa ki hnê mơhno kố athế pêi pro klêi hdrối hâi lơ 25/4. Tơdrêng amê, Khu xiâm xuân pôu râng hnoăng cheăng hnê mơhno ‘na troăng hơlâ kâ liăn khế, liăn kâ tơ’nôm, xoăng kăn ƀô̆ ki ôh tá hmâ dêi tơdroăng cheăng, pro klêi hdrối hâi lơ 30/7.

Khu xiâm râng liăn ngân châ pơcháu hnê mơhno xing xoăng liăn, pơkâ tơleăng mâu kế tơmeăm, tơnêi tơníu, tíu pêi cheăng, xuân môi tiah hnoăng cheăng pơcháu mâu hlá mơ-éa tơmeăm ki kal, pêi klêi hdrối hâi lơ 25/4. Khu xiâm mơjiâng pro tơmeăm khoăng pôu râng ‘na hnoăng cheăng hnê mơhno xoăng tíu pêi cheăng nếo ăm khu kăn pơkuâ ƀă mâu kơ koan ki tơdjâk troh. Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng hbrâ rơnáu tơrŭm séa ngăn kơtăng tơdroăng, xoăng nhên ngế pêi cheăng, rak vế mâu túa tơbleăng ‘na khu kăn pơkuâ nếo sap ing hâi lơ 1/7/2025; pơchân rak vế ki pơxúa ăm kuăn pơlê, malối cho hok tro drêng klâ xoăng cheăm, bêng, tíu xiâm khăm pơlât tơring.