A rôh tơpui tơno, mâu kăn tơkŭm tơpui ‘na tơdroăng ki xúa tuăn ngoâ rơkê ki kuăn mơngế mơjiâng pro AI tung mơjiâng pro tơdroăng ki rơkê plĕng ƀă tơrŭm cheăng rơtế bă Tíu xiâm C4IR (Tíu xiâm Kăch măng kơmăi kơmok 4.0 apoăng dêi Việt Nam), tối ‘na tơdroăng ki rơkê plĕng tung mơjiâng ƀă mơnhông tơrŭm cheăng tíu xiâm liăn ngân dêi kong têa tơrŭm cheăng kong têa ê, rôh tơ’lêi hlâu tơrŭm cheăng mơnhông rơtế ƀă Tíu xiâm liăn ngân lâp plâi tơnêi Pơlê kong kân Hồ Chí Minh.

Tơpui a rôh tơpui tơno, pôa Phạm Minh Chính, Ngế pro xiâm hnê ngăn tơnêi têa tối tiah kố, pơla hdrối kố nah, tơdroăng ki Tíu xiâm Kăch măng kơmăi kơmok rôh má 4 a Pơlê kong kân Hồ Chí Minh châ mơjiâng cho tơtro khât ƀă troăng hơlâ ƀă veăng gum kơhnâ tơbleăng Pơkâ 57 dêi Khu xiâm pơkuâ tơdroăng kal kí ‘na mơnhông tơƀrê khoa hok kong ngê̆, pơhlêh nếo tơmiât rơkê, pơhlêh kơxô̆.

Ngế pro xiâm hnê ngăn tơnêi têa pơkâ thế mâu kăn, mâu khu ki ‘no liăn cheăng tung lâp plâi tơnêi pơtối veăng tơpui tối vâ tŏng gum ‘na troăng hơlâ ƀă túa ki mơhnhôk tơlo liăn vâ mơjiâng tơƀrê khoa hok kong ngê̆, pơhlêh nếo, tơmiât rơkê, pơhlêh kơxô̆.