Kơxo lơ 11/11/2022, Hneăng hôp mâu kăn xiâm ASEAN rôh má 40, 41 hiăng pơxiâm po a pơlê kong xiâm Phnom Penh dêi kong têa Kul ƀă veăng ai mâu kăn xiâm dêi mâu kong têa ASEAN, Kăn xiâm chêh tôm xo rơkong dêi ASEAN ƀă hên mâu kăn teăng mâ kong têa tơrŭm cheăng, khu tơrŭm lâp plâi tơnêi. Pôa Phạm Minh Chính - Ngế pro xiâm hnê ngăn tơnêi têa pin pơkuâ djâ khu kăn Việt Nam veăng hôp. Tơbleăng a hâi pơxiâm po hneăng hôp, pôa Samdech Techo Hun Sen - Ngế pro xiâm hnê ngăn kong têa Kul khĕn kơdeăn hnoăng cheăng ki pơxúa khât tơbâ 55 hơnăm mơjiâng ASEAN, tơkâ luâ chât hơnăm tơrŭm cheăng ƀă tơrŭm tung kơpong, mơdêk tơrŭm pơla mâu ngế tung rơpŏng hngêi ASEAN xua tơdroăng ki pơxúa tơdjuôm cho hơniâp lĕm, khên tơnôu ƀă mơnhông mơdêk.

Hneăng hôp mâu kăn xiâm ASEAN rôh má 40, 41 ƀă mâu Hneăng hôp Khu kăn xiâm ai tơdjâk troh cho rôh vâ mâu kong têa rơtế hvái ngăn nếo ƀă pơkâ ki mơ-eăm ăm môi tơdroăng tung la ngiâ ‘na tơrŭm dêi rơpó, khên tơnôu, tá tơdroăng kơnôm a luât pơkâ. Hên tơdroăng tối tơbleăng ki kal kô châ tơbleăng leh tơbâ 55 hơnăm mơjiâng ASEAN.

Tơbleăng ASEAN pêi pro: rơtế hbrâ rơnáu ƀă tơdroăng pơloăng mơnúa hlối tơbleăng hneăng hôp tơdjêp ASEAN kơ’nâi 2025, cho mâu troăng rơhlâ luât pơkâ vâ mơdêk tơrŭm cheăng, mơnhông tơdâng tơ’mô, tơdjêp ƀă pơtối rak vế hnoăng cheăng ki xiâm dêi ASEAN ‘na tơdroăng cheăng tung kơpong.

Klêi pơxiâm po hneăng hôp, mâu kăn dêi mâu kong têa ASEAN veăng hôp a Hneăng hôp mâu Kăn xiâm ASEAN rôh má 40 ƀă hôp kŭn hneăng hôp mâu kăn xiâm ASEAN rôh má 41.