Kơxo lơ 27/8, Hô̆i đong hnê ngăn kong pơlê Khánh Hòa hneăng má 7, hơnăm 2021 – 2026 po Hneăng hôp chuyên đề. A hneăng hôp, Hô̆i đong hnê ngăn kong pơlê Khánh Hòa hiăng pêi cheăng ‘na mâu ngế pêi cheăng ối tung hnoăng pơkuâ, pôk kăn Phŏ hnê ngăn Vi ƀan kong pơlê Khánh Hòa, hơnăm 2021 – 2026. Klêi pôk, pôa Lê Huyền, Tỉnh ủi viên, Ngế cheăng tung Tiêuh ƀan Mơ-éa chêh Hneăng hôp Đảng ƀô̆ kong pơlê, châ pôk pro phŏ kăn hnê ngăn kong pơlê Khánh Hòa. Mâu kăn hiăng têk kŏng tơbleăng Pơkâ tối tơdroăng ki pôk kố.

Hdrối mê, Khu ki chêh tôm xo rơkong mơhno pôa Lê Huyền, cho Tỉnh ủi viên, Phŏ kăn hnê ngăn Vi ƀan kong pơlê Ninh Thuận hneăng hdrối (hdrối ‘mot tơkŭm môi ƀă kong pơlê Khánh Hòa) veăng cheăng tung Khu pơkuâ ngăn Đảng ƀô̆ kong pơlê Khánh Hòa hơnăm 2020 – 2025. Tiah mê, Vi ƀan hnê ngăn kong pơlê Khánh Hòa nôkố ai 1 ngế kăn hnê ngăn ƀă 4 ngế phŏ kăn hnê ngăn Vi ƀan kong pơlê, tung mê, pôa Trần Quốc Nam cho Kăn hnê ngăn Vi ƀan kong pơlê; mâu phŏ kăn hnê ngăn mê cho: Pôa Nguyễn Long Biên, Trần Hòa Nam, Trịnh Minh Hoàng ƀă Lê Huyền.