A rôh pêi cheăng, pôa Lê Minh Hưng, Ngế pro xiâm hnê ngăn tơnêi têa pơkâ Hngêi arak liăn Tơnêi têa ƀă mâu tíu pêi cheăng ăm mung liăn ôh tá xê tot pơtê a tơdroăng mơnhên mâu tơdroăng châ tơƀrê mê thế mơnhên tơdrăng a mâu tơdroăng ki tơ’lêi ôh tá tơniăn kân. Hnoăng cheăng dêi Hngêi arak liăn Tơnêi têa rế mơdât liăn chu rơpâ, rế thế tŏng gum tơtêk, xua mê kơ-êng ivá pơkuâ thế ƀeăn ƀĕng, hbrâ, tro drêng ƀă tro tơdroăng.

Tơtrŏng ‘na mâu kơdroh tung hlê plĕng pêi pro luât ‘na liăn ngân ƀă tơdroăng ăm mung liăn a mâu khu tơrŭm cheăng, Ngế pro xiâm hnê ngăn tơnêi têa pơkâ thế tơdroăng mơnhên ngăn, séa ngăn hngêi arak liăn kal châ pêi pro krá rơdêi tâ nếo. Xua tâng kơxô̆ liăn ăm mung châ pro tro troăng, mot tung mâu kơvâ pêt mơjiâng tê mơdró ivá kô tơdjâk troh lâp lu kân rơdâ vâ tơtêk ƀă tơniăn kân.