Pôa Lê Thành Long, Phŏ Ngế pro xiâm hnê ngăn Chin phuh hiăng diâp 400 kơxuô tơmeăm Têt ăm mâu rơpŏng kơtiê, vâ chê kơtiê, rơpŏng ai tơdroăng rêh kâ ối pá puât ối tung khu ki xo tơvêh tơnêi vâ pro troăng kân Đồng Đăng – Trà Lĩnh; kŏng nhân, ngế pêi cheăng dêi mâu tíu pêi cheăng, khu mơdró kâ ƀă kŏng nhân dế pêi cheăng a troăng kân a kong pơlê Cao Bằng.

Pôa Lê Thành Long, Phŏ Ngế pro xiâm hnê ngăn Chin phuh tối nhên, tơdroăng ki tŏng gum rêh ối cheăng kâ ăm kuăn pơlê, malối cho mâu ngế ki xơpá cho hnoăng cheăng ƀă xuân cho khôi hmâ “tŏng gum dêi rơpó” tơniăn lĕm dêi hdroâng mơngế Việt Nam; pơkâ thế khu râ Đảng, khu kăn pơkuâ kong pơlê pơtối tơmâng ngăn tơbleăng tơdroăng cheăng tŏng gum kuăn pơlê, rak vế kuăn pơlê tơdah Têt Lo hơnăm nếo tơniăn, hơniâp, ôh tá lôi kơbố ki lâi pa rŏng, rêm ngế, rêm hngêi pơrá ai kế tơmeăm kâ Têt.